Премиерот Зоран Заев е оптимист дека Бугарија на утрешните парламентарни избори ќе добие избере функционален парламент, и политичка влада со која ќе се добие, како што рече Заев, зелено светло за патот на С Македонија кон ЕУ.
Според Заев, при посетата на Бугарија и билатералните разговори на 17 јуни биле адресирани сите важни работи и очекува во декември годинава да биде донесена одлуката.
Тој, исто така, изрази надеж дека изборите во Бугарија ќе бидат исклучително успешни и политичарите ќе креираат коалиција, што ќе биде парламентарно мнозинство и ќе формираат нова бугарска влада, со која ќе ги продолжи разговорите.
„Сакам да им посакам среќа и успех на Бугарите и на бугарската држава на изборите утре, затоа што важно е секоја држава, така и нашиот источен сосед да има стабилен Парламент и да има стабилна политичка влада“,
рече Заев одговарајќи на новинарски прашања по поставувањето на камен темелник за затворен пазар во Виница.
Не се откажуваме и продолжуваме, посочи Заев, се додека не го решиме ова отворено прашање.
„Лично мислам дека ги адресирав сите важни работи на билатералните разговори на 17 јуни при посетата на Бугарија. Остана да се избере бугарскиот парламент и да се избере владата за да имаме надеж дека ќе се донесе одлука. Очекувам декември годинава да биде донесена одлуката, но секако да оставиме процесите да бидат успешни за да може да се израдуваме со позитивна одлука“,
изјави Заев.
Потсети дека 16 години земјава е земја кандидат и дека ниту една друга земја не била толку пофалена и позитивно оценета.
„Верувам дека ова е повеќе прашање на достоинство на ЕУ, отколку наше. Тоа е нашиот пат, ние друг пат немаме и верувам дека ќе се случи“,
изјави Заев.