Како што соопштија од Владата, поранешниот генерал на САД и командант на здружените сили на НАТО за Европа истакнал дека сега, откако заврши неговата војничка кариера, тој е целосно посветен како бизнисмен да го поддржува развојот на земјите од ЈИЕ во делот на нивното економско поврзување со инвеститори од САД и од Европа, а особено во поддршката на владите во борба против корупцијата
Поранешниот генерал на САД и командант на здружените сили на НАТО за Европа, Весли Кларк, денеска е во Скопје, каде што имаше средби со премиерот Зоран Заев и со првиот вицепремиер Артан Груби.
Како што соопштија од кабинетот на Заев, на средбата со Кларк се разговарало за „новата реалност“ за Северна Македонија и за регионот, откако земјата и неколку други земји од Западен Балкан се членки на НАТО.
На средбата, на која присуствувал и вицепремиерот за спречување корупција Љупчо Николовски, Заев го истакнал членството во НАТО како остварување на стратегиската цел на земјата, која го дефинираше геостратегиското место на Северна Македонија во регионот и на меѓународен план, како и придобивките од безбедносната сигурност што создадоа услови и поттикнаа голем број странски инвестиции и економски напредок.
Како што соопштија од Владата, поранешниот генерал на САД истакнал дека сега, откако заврши неговата војничка кариера, тој е целосно посветен како бизнисмен да го поддржува развојот на земјите од регионот и од Југоисточна Европа во делот на нивното економско поврзување со инвеститори од САД и Европа, а особено во поддршката на владите во борба против корупцијата и сивата економија.
„Како искусен познавач на регионот и на политиките за привлекување и поддршка на странските инвеститори на Северна Македонија, поранешниот генерал Кларк на средбата истакна дека во наредниот период ќе го поттикнува интересот на компаниите од САД да инвестираат во нашата земја“,
се наведува во соопштението од средбата Заев – Кларк.
Од кабинетот на Груби соопштија дека првиот вицепремиер остварил средба со поранешниот врховен
командант на сојузничките сили на НАТО во Европа и, како што се посочува, големиот пријател на
Албанците.
За време на оваа средба, Груби истакнал дека денеска се чувствува почестен што во посета на нашата земја е „генералот кој ја водеше мисијата што го заврши болното поглавје од историјата на балканските земји“.
„Груби и Кларк разговараа и за политичката и безбедносната состојба во земјата и во регионот, како и за напредокот и достигнувањата што земјата ги има направено низ годините, станувајќи пример за земјите од регионот во однос на мирот, стабилноста и напредокот. Северна Македонија, како земја-членка на НАТО веќе придонесува во мировните мисии во странство, додека предизвикот на овој пат е благодарение на поддршката и пријателството со САД. Од друга страна, Кларк изјави дека нема да недостига поддршката за целите на Владата за економски развој и социјален просперитет, додавајќи дека Северна Македонија е една од пријателските земји на САД во Европа и симбол на одлучност во демократскиот свет“,
се наведува во соопштението од кабинетот на првиот вицепремиер.
Пензионираниот генерал Весли Кларк вчера престојуваше во Косово, каде што имаше средби со повеќе официјални лица, меѓу кои и премиерот Албин Курти и косовската претседателка Вјоса Османи.
„Државата Косово е најголемиот пријател на САД во Европа“,
изјавил Кларк на средбата со Курти.
Како што пренесува „Косово онлајн“, Кларк потсетил на времето кога поранешниот претседател на САД, Бил Клинтон, по неговата последна посета на Косово, му рекол дека Косово е најдоброто нешто што го направил за време на неговото осумгодишно претседателство.
