Од Основниот кривичен суд велат дека, откако е констатирано дека поротникот наполнил 60 години, веднаш го известиле Судскиот совет и сè додека тој евентуално не биде разрешен ќе си ја извршува функцијата. Оттаму потсетуваат дека и во минатото имало вакви случаи во голем број судски постапки, па на поротниците кои наполниле 60 години им се дозволувало да го истераат четиригодишниот мандат
На судија поротник, кој наполнил 60 години, а е дел од судечкиот совет во случајот „Талир“, каде што е замрзнат имот на ВМРО-ДПМНЕ, треба да му се констатира престанок на мандатот.
Ова е едно од барањата со кои вчера партискиот лидер Христијан Мицкоски, а денеска и портпаролот Димче Арсовски настапија во јавноста, но и во судницата во Основниот кривичен суд во Скопје побараа судијата поротник Митко Сандев да не биде повеќе дел од судечкиот совет.
„Денеска во 10 часот требаше да почне рочиштето, каде што ВМРО-ДПМНЕ е меѓу обвинетите. Она што го кажав во судницата е барањето за престанок на мандатот на судијата поротник, Митко Сандев, од две причини. Прво, со одлуката на Уставниот суд 162/2006-0 од 2007 година се предвидува на секој судија поротник кој има навршено 60 години да му престане мандатот на дејствување во постапките. Втората работа е изземање на овој судија поротник, бидејќи е член на тело на политичка партија, што доведува до тоа дека тој може да дејствува со одредена пристрасност“,
изјави Арсовски денеска пред судот кој посочи дека станува збор за политичка партија која е во коалиција со власта.
Арсовски во изјава за медиумите го прозва и претседател на судот, Иван Џолев, дека не поднел иницијатива за престанок на мандатот на портникот и го нарече „главен извршител на Зоран Заев“.
Покрај овие причини, Мицкоски вчера рече дека случаите „Талир 1“ и „Талир 2“ директно влијаеле врз капацитетот на партијата за време на изборните активности.
На наводите од опозицијата, не молчеше владејачкиот СДСМ и побара ВМРО-ДПМНЕ да престане со притисоците врз судството.
„За ВМРО-ДПМНЕ е несфатливо дека правосудните органи денес работат независно и професионално ослободени од политички и лични притисоци. Затоа, како во режимот продолжува да врши притисок врз судството, да кажува како треба да работат и да одлучуваат правосудните институции во предмети во кои е инволвирано и самото ВМРО-ДПМНЕ. Опозицијата не може да се ослободи од режимската матрица во која е заглавена со години, не може да се помири со независно владеење на правото, па затоа очајно се обидува преку нарачки и притисоци да се меша во работата на правосудството“,
реагираа од СДСМ.
„Поротникот ќе си ја извршува функцијата додека, евентуално, не го разрешат“
По прозивките од опозицијата, се огласија и од Основниот кривичен суд од каде велат дека, откако е констатирано дека истиот наполнил 60 години, веднаш го известиле Судскиот совет и сè додека поротникот евентуално не биде разрешен, ќе си ја извршува функцијата.
Исто така, од судот потенцираат дека Законот за судовите е нејасен односно додека со него се предвидува завршување на мандатот со наполнети 60 години, од друга страна. со Законот за работни односи, за работоспособни се сметаат сите лица до 64 години.
„Судот сака да појасни зошто не е поднесено ’Барање за негово разрешување‘ туку е дадено само ’Известување‘. Имено Законот за судови е нејасен во смисла на изборот и разрешувањето на судиите-поротници. Збунувачки е што Законот истовремено предвидел дека за судија поротник со мандат од четири години може да биде избрано секое лице до навршување на 60 години, а истовремено предвидел и дека со навршувањето на 60 години поротникот треба да се разреши. Ваквата недореченост на Законот, која создава забуна, е критикувана и од домашната експертска јавност, но и од Меѓународната заедница, дури е квалификувана и како дискриминациска, имајќи предвид дека за работно способни лица во РСМ, согласно ЗРО – Законот за работни односи, се сметаат сите лица до 64 години старост“,
велат од Судот.
Кривичен потсетува дека и во минатото имало вакви случаи во голем број судски постапки, па на поротниците кои наполниле 60 години им се дозволувало да го истераат четиригодишниот мандат, со цел постапката да има економичност, бидејќи при промена на составот на судечкиот совет, судењето да почне од почеток.
„Станува збор за веќе воспоставена судска пракса, така што доколку овој поротник не биде разрешен од Судскиот Совет,тоа не би претставувало исклучок како што се сака да се претстави во јавноста“,
велат од судот.
Во однос на имотот на ВМРО-ДПМНЕ, пак, потенцираат дека судија-поротник воопшто не учествува во носење на одлука за замрзнување на имот, туку тоа е во надлежност на Кривичниот совет составен од тројца судии.
„Заканите за кривична одговорност на судии и поротници нема да ни влијаат на одлуките“
Исто така, апелираат да се престане со тенденциозни коментира и етикетирања.
„Наместо навредливото етикетирање на судството како ’луј витон‘, ’сваровски‘, ’трас-трас-судство‘, кои изминативе години доаѓаа од различни политички структури, потребно е да се покаже поголема почит кон правносудскиот систем генерално, бидејќи навреда на третата власт, е и навреда на граѓаните на РСМ кои се претставувани во судските постапки преку судиите поротници, а колку се важни граѓаните упатува и фактот дека нивниот глас е еднаков со гласот на судијата при носењето на одлуките. Воедно апелираме и да се престане со постојаните закани за кривична одговорност на судиите и судиите-поротници, бидејќи таквиот вид на притисок нема да влијае врз носењето на судските одлуки, а од друга страна говори и за неукоста на тој што изнесува такви закани, па дури и за обид од негова страна за попречување на правдата“,
велат од Судот.