Вицепремиерот Николовски изјави денеска дека треба да се знае кој за што е одговорен и дека тој не може да навлегува во судски постапки
ВМРО-ДПМНЕ реагира и денеска за пуштањето на поранешниот генерален секретар на Владата од затворски во куќен притвор, посочувајќи дека Заев се дрзнал да влијае на постапка затоа што Драги Рашковски е негов директно потчинет во владата.
„Се што знае Заев во голема мерка знае и Рашковски. Дека Рашковски е свесен за калта во која заглавил доказ е и префрлањето на имотот врз своите малолетни деца. Што и од кого крие со тоа? Дали со тргањето имот од себе сокрива некаква трага“,
прашуваат од ВМРО-ДПМНЕ, нагласувајќи дека Судството и ЈО не смеат да подлегнуваат под притисокот на Заев и Рашковски не смее да има можност за влијание врз постапката.
Со реакција се јави и опозициската коалиција Алијанса на Албанците/Алтернатива, нарекувајќи го Рашковски еден од главните криминалци во Владата.
„Драги Рашковски се враќа дома. Уште еден од главните криминалци на Владата кој со парите на граѓаните стана милионер, одмараше во Мексико и купува луксузни станови и возила, се спаси од политичкото судство на СДСМ и ДУИ. Ослободувањето на Рашковски од Шутка доаѓа по изјавата на премиерот Зоран Заев дека не и верува на обвинителката, туку верува дека Рашковски е невин“,
реагираат од Алијанса/Алтернатива.
Вицепремиерот Љупчо Николовски изјави денеска дека треба да се знае кој за што е одговорен и дека тој не може да навлегува во судски постапки и да коментира дали некој е невин или не.
„Системски ги менуваме работите за кои одговорност треба да има за секој. Ако до пред некоја година институциите биле затворени за јавноста и за медиумите, денеска институциите се отворени. Мислам дека конечно ги ослободивме институциите, а судството и обвинителството треба да си продолжат да си ја вршат својата работа и да бараат одговорност во случаите“,
нагласи Николовски, коментирајќи за одлуката на обвинителството да нема одговорност за бегство на Сашо Мијалков и за одлуката на судот за излегување на Рашковски од затворски притвор.
Според Николовски, случаите со Мијалков и Рашковски, како и други, потврдуваат дека денес нема недопирливи.