Според истрагата на ОЈО, мигрантите за од 500 до 700 евра илегално биле префрлани од Грција на територијата на нашата земја преку илегални премини, а по престој во кумановско-липковскиот крај преку Србија биле носени во земјите од ЕУ
Триесет и тригодишен велешанец ја предводел криминалната група која утрово беше уапсена за шверцување мигранти. Во неа биле и две лица кои потекнуваат од земјите од Блискиот Исток. Мигрантите по потекло од Авганистан, Пакистан, Сирија, Бангладеш и други земји од Блискиот и Средниот Исток илегално биле префрлани од Грција на територијата на нашата земја преку илегални премини на т.н. „зелена граница“ во околината на Гевгелија, Струмица и Демир Капија, а оттаму со помош на водичи т.н. „качаци“, координирано биле носени на претходно утврдени и договорени локации.
Како што соопшти ОЈО, организаторот и членовите на криминалната група го договарале преземањето на мигрантите од овие локации и со патнички и товарни возила ги превезувале до локации во Кумановско-липковскиот регион каде што мигрантите биле прифаќани и времено сместувани и засолнувани. Понатаму, преку територијата на Србија се носеле кон државите на ЕУ. За ова мигрантите плаќале од 500 до 700 евра по лице, преку агенти за брз трансфер на пари или во готовина.
Апсењата се направени во текот на денешниот ден во координирана полициска операција на националната единица за сузбивање на криумчарење мигранти и трговија со луѓе и Одделот за специјални и посебни операции на СВР Скопје и СВР Струмица.
Извршени се претреси во објекти на 11 локации на подрачјето на Велес, Скопје, Штип, Струмица и Валандово и уапсени се шест лица, а се преземаат мерки за приведување на уште три лица. Четири члена на криминалната група веќе се во затвор, за претходно сторени вакви кривични дела.
Од ОЈО најавуваат дека за осомничените ќе се бара притвор.