Бугарија ја разгледува можноста, државната помош за туризмот да биде искористена за бесплатни кампови за ученици и студенти од С Македонија во бугарските планински и приморски одморалишта
Бугарскиот претседател Румен Радев денеска во Рим најави дека Бугарија ќе и донира големо количество вакцини против ковид Северна Македонија.
Како што јави дописникот на МИА од Софија, Радев, во изјава за бугарските медиуми по неговата средба со шефот на италијанската држава Серџо Матарела, рекол и дека Бугарија ја разгледува можноста, државната помош за туризмот да биде искористена за бесплатни кампови за ученици и студенти од С Македонија во бугарските планински и приморски одморалишта.
Исто така, со македонскиот претседател Стево Пендаровски, со кога заедно отапуваа во Рим, ја разгледувале идејата ученици и студенти од земјава да минат дел од одморот заедно со деца од Бугарија.
„Разговараме со претседателот Пендаровски да поканиме ученици и студенти од Северна Македонија да поминат дел од нивниот одмор со нашите деца, заедно со наставниците, така што ќе имаме едукативна и хуманитарна програма. Ако успееме да го постигнеме тоа, ќе се направи најважниот чекор за надминување на децениска пропаганда на инсинуации и спротиставувања меѓу двете држави. Ако ги собереме нашите млади луѓе заедно, сигурен сум дека тоа ќе неутрализира какви било пропаганди“,
нагласи Радев.
Во однос на членството на нашата земја во ЕУ, Радев рекол дека Матарела е целосно солидарен со бугарскиот став за пристапувањето.
„Сите сакаме да ги видиме овие земји на нивниот европски пат што е можно поскоро, но има јасни критериуми за членство, што секоја земја мора да покаже дека ги исполнува одржливо и неповратно. Јас многу јасно ја објаснив бугарската позиција дека ќе постигнеме напредок во однос на прашањето за проширување кога самите земји ќе ја покажат јасно, категорично и неповратно нивната волја за напредок“,
потенцира Радев, додавајќи дека ваквиот став го споделуваат многу европски лидери, истакнувајќи дека напредок во проширувањето ќе се постигне со силни позиции на самите земји кандидати.