Од Секторот за внатрешна контрола од Охрид предупредуваат дека во последниве неколку дена добиле пријави од граѓани дека одредено лице им дојавува за наводно случени сообраќајни несреќи на нивни роднини и блиски, со цел да се изнудат пари.
Како што информира портпаролот на СВР-Охрид, Стефан Димоски, полицијата работи на случајот за пронаоѓање на лицето.
„СВР-Охрид презема мерки за пронаоѓање на лице кое деновиве преку телефонски јавувања кај граѓани од Охрид, Струга и Кичево, лажно се претставува како полициски службеник и врши измама за наводно случена сообраќајна незгода во која жртви или тешко повредени се членови на нивните семејства. Притоа, предизвикувајќи огромна вознемиреност, бара пари за понатамошна постапка“,
информира Димоски.
Тој апелира до граѓаните да не наседнуваат на вака добиени телефонски известувања и да ги пријават на 192 или лично во најблиската полициска станица.