На овој Закон се спротивставија и дел од помалите парламентарни партии кои се дел од владејачкото мнозинство и го повикаа претседателот Пендаровски да не го потпишува Указот
Да се повикуваме на владеење на право, а да носиме закони за легализација на дивоградби од етички и правен аспект не е можно, вели пратеничката од ВМРО-ДПМНЕ, Гордана Силјановска-Давкова, во нејзиниот говор за време на собраниската расправа за Законот за легализација на дивоградбите.
Законот беше донесен во вторникот со поддршка на пратеници и од власта и од ВМРО-ДПМНЕ, Силјановска-Давкова гласаше „против“, а денеска на социјалните мрежи потсетува на нејзиниот говор во кој објаснува зошто не ја поддржува легализацијата.
„Јасна ми е дека има различни ситуации во реалноста и има разлики од еден бесправно изграден објект и друг бесправно изграден објект, знам дека некои граѓани понекогаш од нужда се принудени да пристапат кон вакво нешто, но мислам да се повикуваме на владеење на правото, а да носиме закони за уредување на правен статус на бесправно изградени објекти од правен и етички аспект не е можно. Едноставно не можете да утврдите правен статус и легитимитет на нешто што е бесправно изградено. Не можам да судам за минатите ситуации, но мислам дека треба да собереме сила да ставиме крај на ваквите постапки и закони. Не само затоа што се директен атак врз деталното и просторното урбанистичко планирање, туку се непознат феномен во компаративните политички системи и во компаративното право“,
вели Силјановска-Давкова.
Во нејзиниот говор, на кој потсетува, таа изнесе и неколку поенти за конкретни законски одредби. Го наведе дека член 2 во кој пишува дека под бесправно изградени објекти се подразбираат „објекти од значење за Републиката и од локално значење“, па прашува како може да има значење за Републиката или локално значење нешто што е спротивно на правото.
„Исто така во ставот 5 на членот 2 се вели дека по исклучок предмет на овој закон се бесправни објекти чија изградба претставува јавен интерес. Јавниот интерес секогаш се врзува за јавно добро, јавниот интерес мора да биде правно врамен. Не може да биде јавен интерес нешто што е бесправно. Добро е што се изземаат, ако воопшто има нешто добро во членот 4, објектите во границите на охридскиот регион, но јас ве уверувам дека најголем дел од дивоградбите таму ќе нè убедуваат дека не се од такво значење за да уживаат заштита и закрила на УНЕСКО туку дека се од поинаков карактер“,
вели пратеничката.
Таа го цитираше и членот 8 во кој меѓудругото има опција како подносител на барање за легализација да биде и странски државјанин.
„Замислете, тоа што странците не може да го направат во нивните држави каде владее правото, можат да го направат овде. Џабе ние зборувавме за заштита на Шар Планина ако таму има стотина дивоградби. И кога уште ќе ви кажат дека во дивоградбите се вброени и базените помислувам на профилот на луѓето кои на ваков начин ќе стекнат уште едно богатство што ќе им овозможи комфор“,
рече Силјановска-Давкова.
На овој Закон се спротивставија и дел од помалите парламентарни партии кои се дел од владејачкото мнозинство. Пратениците од ДОМ, ЛДП и Демократскиот сојуз испратија и писмо до претседателот Стево Пендаровски во кое побараа тој да не го потпишува Указот за прогласување на Законот за утврдување правен статус на бесправно изградени објекти.
*Поврзани вести:
Скандалозна одлука на Собранието: Изгласана амнестија за Стевче Јакимовски
Законот за легализација на дивоградби ќе ја „амнестира“ и терасата на ВМРО-ДПМНЕ?
Влада: Со Законот за легализација на дивоградби ќе се спречи урбаното дивеење
Антикорупциска ќе поднесе иницијатива пред Уставниот суд за Законот за легализација на дивоградби
Ѓорѓи Спасов: Голема грешка е Законот за легализација на дивоградбите, СДСМ ќе има најголема штета