Договорот од Преспа е големо достигнување, бидејќи донесе решение за двата народи, но и за целиот регион и за Европа, било истакнато на средбата на премиерот Зоран Заев со поранешниот британски премиер Тони Блер што се одржа на маргините на Економскиот Форум Делфи во Атина.
„Договорот од Преспа отвори врати за напредокот и стави препрека на новите национализми, а решенијата од договорот денес значат и економски потенцијали. Сѐ е до квалитетот на владите, а на малите земји им требаат глобални погледи за квалитетни решенија“
заклучиле Заев и Блер, се наведува во соопштението од владината прес-служба.
Посебен фокус во разговорот, бил ставен на справувањето со глобалните предизвици кои ги наметна ковид-19 пандемијата, а Заев и Блер се согласиле дека вакцинацијата е едно од најдобрите глобални решенија.
„Двајцата разговараа за можностите за соработка и инвестиции со глобалната ИТ компанија „Оракл“ во делот на менаџирање со податоци при справувањето со ковид-19, односно за ставањето во функција дигитални дата бази за регистрирање и верификација на граѓаните кои се вакцинирани со цел нивна побрза мобилност низ целиот свет“
стои во соопштението.
Заев и Блер, како што стои во соопштението, изразиле задоволство од одличните билатерални односи меѓу Република Северна Македонија и Обединетото Кралство и надеж дека во иднина пријателството ќе се продлабочи.