Генералниот секретаријат на Владата и Академијата за судии и јавни обвинители работат и до крајот на неделата би се знаело како ќе се завршат испитите за новите кандидати во Академијата откако беа запленети компјутери на „Инвока гроуп“, фирмата преку која досега се спроведуваше тестирањето.
„Генералниот секретар Мухамед Зекири ме извести дека добиле известување дека поради заплена на компјутерите на ’Инвока‘ не се во можност да спроведат определени тестирања. Откако бевме известени како Влада, директорката на Академијата Наташа Габер и генералниот секретар стапија во контакт и бараат решение како да се дојде до што поскоро овозможување на компанија која ќе може технички да ги спроведе испитите. Мислам дека е во завршна фаза на елиминациони испити на Академијата. Важно е овој процес за оваа генерација да го завршиме, јас верувам дека ќе се најде решение за тоа брзо да се направи. Тимовите на генералниот секретаријат и на Академијата работат, ние како Правда помагаме за во наредните денови, до крајот на оваа недела точно да го исцртаме патот како да се заврши овој процес со последниот испит на конкурсите за оваа генерација над 97 нови места“,
изјави министерот за правда Бојан Маричиќ.
Компјутерите беа запленети при претрес во простории на Правниот факултет во Скопје, кои ги користела „Инвока гроуп“ и управителот Даниел Станчев. Претресите се случија во рамки на истрагата што ја отвори Обвинителството за гонење организиран криминал и корупција против Станчев, поранешниот генерален секретар на Владата Драги Рашковски и уште две лица, со оглед дека токму „Инвока гроуп“ е и фирмата преку која е направена и спорната набавка на софтверот за сообраќајни прекршоци – случај што0 го отвори „360 степени“.
Во претресот на Правниот факултет, компјутерите биле запленети, додека софтверот за испитите не е одземен.