Сите пратеници од пратеничката група предводена од СДСМ денеска ќе се појават во „А1 арената“ во „Борис Трајковски“ на закажаните термини за вакцинација. Пред да се вакцинираат, прават консултации со лекарите дали да се вакцинираат сега или подоцна, се информациите што ги соопштија од владејачката партија.
„Од нашата пратеничка група сите пратеници денеска се тука присутни, прават консултации и со лекарите и со сите здравствени работници што се тука, во смисла на тоа кои се тие коишто го прележале вирусот, дали треба да примат денес вакцина или треба да одложат за следен период, со оглед на тоа што, не знам како ги кажуваат стручно, имаат одреден број на антитела. Од информациите што ги имам од другите пратенички групи дека ќе се појават сите пратеници со истите консултации, знам дека и другите пратенички групи ќе се појават исто така во текот на денот и ќе го завршат процесот на вакцинација или ќе го почнат, со оглед на тоа што треба да има и втора вакцина во следниот период“,
изјави координаторот на пратеничката група на СДСМ, Јован Митрески.
За интересот на пратениците за вакцинација денеска изјава даваше и претседателот на Собранието Талат Џафери, кој рече испратил целосен список и секој од пратениците си добил термин, а колку од нив ќе се појават, како што вели, е нивна одлука.
Пратениците се вакцинираат со руската „спутник В“, а тоа предизвика и негодување кај дел од нив. Пратеникот и лидер на Демократски сојуз, Павле Трајанов, реагираше дека пратениците се дискриминирани. Неговата забелешка е во тоа што првично им било најавено дека ќе се вакцинираат со „Фајзер“, но денеска им била аплицирана руската вакцина „спутник В“.
Процесот на вакцинација, барем кај мнозинството, влева надеж дека парламентот ќе се врати во нормала, односно ќе се избегнат сценаријата кога поради отсуство на неколку пратеници од власта кои се во изолација, не може да се обезбеди кворум за гласање.
„По втората доза што ќе ја примат ќе се овозможи посоодветна работа на Собранието и се надевам од втора половина на мај да се врати нормалниот начин на работа на Собранието, секако, почитувајќи ги и понатаму одлуките и протоколите“,
изјави денеска Џафери.
Слични очекувања изрази и Митрески од СДСМ одговарајќи на прашањето дали ова ќе биде и вакцина на помирување.
„Оваа вакцина, според информациите коишто ги имам, се однесува за друго, но се надевам дека ќе помогне и во тој процес за да излеземе заедно од кризата којашто се случува во Собранието со единствена цел да работиме во интерес на граѓаните и на оние коишто нѐ избрале“,
рече координаторот на социјалдемократите.