Основното јавно обвинителство бара парични казни од по две илјади евра за шест лица, кои на 13 јануари се собрале во стан во Скопје на улица „Иван Козаров“ за прослава на Стара нова година – Василица. Предлогот за издавање казнен налог според Обвинителството е поради непочитување на здравствени прописи за време на епидемија.
„Иако со мерките и прописите во периодот од 18.12.2020 до 21.01.2021 година беа забранети секој вид масовни прослави на отворен и затворен простор, како и семејни собири со повеќе од 4 лица, обвинетите биле затекнати од полициски службеници при извршена проверка и контрола. За нив јавниот обвинител му предложи на судот да определи парични казни од 100 дневни глоби со поединечна вредност на дневната глоба од 20 евра“,
се наведува во соопштението од Обвинителството.
За истото кривично дело Основното јавно обвинителство Скопје поднесе предлог за издавање казнен налог и против шест други лица што не го почитувале полицискиот час. Тие на 6 април, спротивно на важечките прописи што определуваат забрана за движење во временскиот период од 20 до 05 часот следниот ден, биле затекнати во група како се движат на улицата „Максут Садик“ во Скопје без да поседуваат дозвола за тоа.
И за овие обвинети јавниот обвинител му предложи на Судот да определи парични казни од по 100 дневни глоби, при што висината на една дневна глоба се одредува на 20 евра во денарска противвредност.