Меѓутоа, од ова европско регулаторно тело на денешната прес-конференција, повторно укажаа дека оваа последица е многу ретка и бенефитите и натаму се поголеми од ризиците
По оваа прес-конференција ЕМА ќе разговара со здравствените власти во сите земји од ЕУ за вакциналните стратегии, но секоја членка сама може да одлучи како понатаму ќе вакцинира со дозите на оваа компанија и дали смета дека треба да се ограничи вакцинацијата на одредени групи од населението
Европската агенција за лекови (ЕМА) потврди дека постои поврзаност помеѓу вакцината на „Астра Зенека“ и згрутчувањето на крвта, јави МИА од Брисел.
Меѓутоа, од ова европско регулаторно тело на денешната прес-конференција, повторно укажаа дека оваа последица е многу ретка и бенефитите и натаму се поголеми од ризиците.
За експертите од Агенцијата мора да продолжи вакцинацијата со сите расположливи вакцини затоа што тие спречуваат тешка форма на болеста и хоспитализација.
Агенцијата ќе ги информира сите здравствени работници како да ги детектираат знаците на згрутчување на крвта кај пациентите, а предупредувањата во упатството за „Астра Зенека“ ќе бидат актуализирани и ќе го содржат и згрутчувањето на крвта како можна последица од оваа вакцина.
„По продлабочена студија, Комитетот за фармаковигилентност на ЕМА заклучи дека невообичаено згрутчување на крвта по вакцинирањето со ‘АстраЗенека’ треба да биде вклучено како можен нусефект“,
изјави Имер Кук, претседателка на Европската агенција за лекови.
Засега начинот на кој се случува оваа реакција не е јасен и како една од можните причини е дека се случува имунолошка реакција слична на таа што се случува кај пациенти третирани со „хепарин“.
Ризикот од тромбоза по „Астра Зенека“ може да се случи до две недели по вакцинирањето, а можни знаци, меѓу другото, се краток здив, тешкотии со дишење, болка во вратот, главоболка и заматен вид.
Доктор Сабине Штраус од ЕМА повика вакцинираните лица да ги информираат брзо и детално здравствените работници за можни нус појави за да се помогне во натамошната анализа на оваа и другите вакцини.
„Лицата кои мислат дека преживуваат нус појава треба што е можно подетално да пријават“,
рече Штраус.
Во овој момент стапката на пријавување на нус ефекти е еден на 100 илјади во Германија, додека во Обединетото Кралство е околу еден на 600 илјади, што е можно објаснување и за тоа зошто помалку случаи на тромбоза се пријавени во оваа земја.
„Многу зависи од тоа каков е системот на пријавување во секоја земја, и како се идентификуваат случаите, знаеме дека во Германија е направена огромна работа во овој дел, таму стапката е еден на сто илјади, додека во Обединетото Кралство стапката е многу пониска“,
додаде Штраус.
По оваа прес-конференција ЕМА ќе разговара со здравствените власти во сите земји од ЕУ за вакциналните стратегии, но секоја членка сама може да одлучи како понатаму ќе вакцинира со дозите на оваа компанија и дали смета дека треба да се ограничи вакцинацијата на одредени групи од населението.
Претходно вчера официјалниот претставник на Европската медицинска агенција (ЕМА), Марко Кавалери, потврди дека постои поврзаност меѓу вакцината на „Астра Зенека“ и случаите со тромбоза. Тој во интервју за италијанскиот весник „Месаџеро“ појаснува дека се потребни дополнителни испитувања за тоа како се предизвикува тромбозата по примањето на вакцината.