Kомандирoт на полициската станица во Гази Баба при СВР Скопје, С.В. (49), е разрешен бидејќи во повеќе наврати сексуално вознемирувал вработена колешка, што на крајот резултирале со закана кон неа бидејќи му ги одбила непристојните предлози. Последното вознемирување било на 7 ноември 2019.
До оваа констатација дојде Одделот за внатрешна контрола во МВР по добиено известување за сексуално вознемирување, од каде што во минатиот период ги извршиле потребните проверки и направиле службени разговори со инволвираните лица во случајот.
„При извршените контроли од страна на Одделот за внатрешна контрола, уште две други полициски службенички вработени во полициската станица Гази Баба пријавиле дека на ист начин биле вознемирувани од страна на командирот, но со оглед на времето поминато од случување на овие настани постои апсолутна застареност за донесување решение за изрекување дисциплинска мерка“,
се вели во соопштението на МВР.
Од МВР, исто така, посочуваат дека контролата констатирала дека командирот не постапувал согласно планот на службите во станицата. Станува збор за настан од 30 мај лани, кога тој не изготвил ниту службена белешка во која ќе ги образложи причините поради кои не е постапено. Истиот ден, според МВР, командирот без да извести некој од претпоставените, со службено возило се упатил во с. Брњарци каде што се задржал неколку часа.
„Со овие дејствија командирот С.В. сторил потешко кршење на работниот ред и дисциплина, согласно одредбите од Колективниот договор на МВР за што од страна на Одделот до началникот на СВР Скопје е поведена иницијатива за поведување постапка за утврдување дисциплинска одговорност и отстранување од работното место до завршување на постапката”,
информираат од МВР.
Истовремено до обвинителството е доставено и барање за координација за натамошно постапување.