Хрватска на Самитот во Загреб во мај годинава ќе посвети особено внимание на деблокирање на почеток на пристапните преговори со Северна Македонија и Албанија, изјави денеска хрватскиот премиер Андреј Пленковиќ, претставувајќи ги приоритетите на хрватското претседателство со ЕУ, на состанокот на претседателите на комисиите за европски прашања на парламентите на земјите членки на ЕУ.
„Отвореноста на Европа, како во 90-тите години, никогаш повеќе нема да се повтори. Сега имаме внимателно дизајниран процес на проширување“, рече Пленковиќ додавајќи дека не е фер што Северна Македонија е на чекање за отворање на пристапните преговори и по промената на името и уставот.
Оптимистички најави за позитивен исход од Самитот во Загреб за Скопје и Тирана досега во повеќе наврати стигнаа и од претседателката на Европската комисија Урсула фон дер Лајен, која на прес-конференцијата со Пленковиќ во Загреб пред десет дена рече дека двете земји ги исполнија критериумите што ЕУ ги бараше од нив и сега треба ЕУ да ги исполниме ветувањата.