Европската агенција за лекови (ЕМА) за в четврток најавува вонреден состанок откако неколку држави ја суспендираа употребата на вакцината против ковид-19 на производителот „Астра Зенека“ поради смртни случаи. Тогаш се очекува да ги споделат и заклучоците по однос на безбедноста на вакцината.
„Комисијата за безбедност на лекови при ЕМА внимателно ќе ги разгледа информациите што земјите членки на ЕУ ги доставија откако ја суспендираа употребата на ‘Астра Зенека’ во процесот на имунизација против ковид-19“,
соопштија од ЕМА.
Во последниве денови неколку земји, меѓу кои и Италија, Франција, Германија, Данска, одлучија да ја суспендираат употребата на британско-шведската вакцина против ковид на „Астра Зенека“ откако се појавија сомнежи за поврзани со згрутчување на крвта, кои засега не се докажани.
Европската агенција за лекови претходно наведе дека истражува одреден број случаи кај кои се згрутчила крвта откако ја примиле вакцината, но тие тврдат дека вакцината е безбедна и дека сепак носи повеќе бенефит отколку ризици.
Повеќе од 11 милиони дози од вакцината на „Астра Зенека“ досега се администрирани низ Велика Британија, а бројот на згрутчување на крвта пријавени по вакцинирањето, како што се наведува, не е поголем од бројот што би се случил природно кај вакцинираната популација.
Францускиот претседател Емануел Макрон денеска изјави дека вакцинацијата ќе престане додека ЕМА не спроведе нова проценка за тоа дали постои некаква врска меѓу вакцината и пријавените инциденти на згрутчување на крвта.
Италијанскиот регулатор на лекови „Аифа“, исто така, прекинот на вакцинацијата со оваа вакцина низ целата земја, го нарече „потег на претпазливост“.
„Астра Зенека“ вчера соопшти дека нема докази дека вакцината против ковид-19 го зголемува ризикот од згрутчување на крвта.