Шефовите на дипломатиите на Грција и Хрватска, Никос Дендиас и Гордан Грлиќ Радман, денеска имаа средба на која една од точките беше европската перспектива на земјите од Западен Балкан, јави дописничката на МИА од Атина.
Грчкиот министер рече дека на хрватскиот колега му ја повторил волјата од грчка страна за одржување на првата меѓувладина конференција на С Македонија со ЕУ.
„Детално разговаравме за европската перспектива на земјите на Западен Балкан, секогаш во рамките на поставените услови и критериумите поставени за секоја земја, но со хрватската страна се согласивме дека за нас, случајот со Западен Балкан претставува стратегиски приоритет и заедничка цел. Ја повторив нашата волја за меѓувладина конференција со Северна Македонија, но и со Албанија веднаш штом ќе бидат исполнети критериумите утврдени од Европскиот совет“,
рече Дендиас.
Двајцата министри се согласиле дека треба да се зајакне политиката на проширување на ЕУ.
„Ќе треба Европската Унија да остане доследна за земјите од Југоисточна Европа, од Западен Балкан да не ја загубат нивната европска перспектива“,
истакна министерот за надворешни работи на Хрватска.
Инаку, Дендиас и Радман се помеѓу деветтемина министри за надворешни работи на земји членки на ЕУ кои преку писмо побараа од шефот на европската дипломатија Жозеп Борел да го врати Западен Балкан на агендата.
„Веруваме дека е крајно време да погледнеме стратегиски на Западен Балкан. Многу работи се сменија од нашата последна дискусија во август 2019. Имаше динамичен политички развој во земјите од овој регион. Дополнително, пандемијата ги влоши постоечките трендови вклучувајќи ги и геополитичките импликации. Други актери се подготвени да настапат во регионот, честопати на наша сметка. Додека ЕУ мобилизираше голема поддршка за регионот, други актери беа поефикасни во презентирањето на нивната поддршка поткопувајќи ја довербата во нас, кредибилитетот и перцепцијата на нашата солидарност“,
напишаа шефовите на дипломатиите во писмото до Борел.
Покрај Дендиас и Радман, потписници се и министрите на: Австрија – Александар Шаленберг, Чешка – Томаш Петшичек, Германија – Хајко Мас, Ирска – Симон Ковни, Романија – Бодан Ауреску, Словачка – Иван Корчок и Словенија – Анже Логар.