Четиричлено семејство, со помош на тетовската полиција, вчера било евакуирано од викендичка на Попова Шапка, каде што останало блокирано поради снежни навеи на патот.
Полицијата била ангажирана откако едниот член од семејството се јавил за помош и посочил дека немаат струја и храна во викендичката. Со помош на возило на СВР Тетово, семејството е вратено во Скопје.
„Вчера во 12 часот и 40 минути, Б.А. (35) од Скопје во СВР Тетово пријавил дека поради големи снежни навеви бил отсечен пристапот до неговата викендичка на Попова Шапка, во која се наоѓале и сопругата и двете малолетни деца и дека поради тоа, тие не се во можност да излезат надвор и да заминат кон Скопје. Б.А., исто така, кажал дека во викендичката немаат електрична енергија и дека веќе немаат резерви од храна и огрев. Веднаш по пријавата, полициски службеници од Полициското одделение Попова Шапка се упатиле кон викендичката за да ги евакуираат лицата, а во меѓувреме во координација со локалната самоуправа е ангажирана и потребната механизација за пробивање на пат, по што лицата со возило на Секторот за внатрешни работи Тетово се пренесени до нивниот дом во Скопје“,
информира Марјан Јосифоски, портпарол на СВР Тетово.
Ноќта помеѓу неделата и понеделникот, поради силен ветер и интензивни врнежи од снег, завеан беше патот во населбата со викендички на Попова Шапка. Околу полноќ дошло до прекин во снабдување со електрична енергија.
„Механизација вчера до 21 часот го расчистуваше патот, а утринава се продолжи со работа. Патот е речиси исчистен, но ноќеска повторно врнеше снег, а за среќа нема ветер“,
изјави Хавзи Ризвани, претседател на месната заедница и здружение на граѓани сопственици на викендички на Попова Шапка.