Без разлика што Трамп повеќе не е претседател, Сенатот може да му забрани повторно извршување на функцијата
Републиканците во американскиот Сенат бараат од демократите да го одложат до февруари почетокот на судењето за поранешниот претседател Доналд Трамп, во рамки на постапката за импичмент.
Нивното барање, наведува Би-би-си, се заснова на тоа да му се даде доволно време на Трамп да подготви одбрана за обвинувањата дека го поттикнал упадот во зградата на Конгресот во Капитол Хил на 6 јануари. Барањето до демократските сенатори го упатил лидерот на републиканците во Сенатот, Мич Меконел, кој претходно изјавуваше дека смета оти Трамп го поттикнал упадот. Тој побарал од демократите во Претставничкиот дом да го одложат праќањето на импичментот во Сенатот до 28 јануари, што ако се случи, прописите предвидуваат две недели од тогаш, односно до 11 февруари, за Трамп да подготви одбрана.
Демократите од Претставничкиот дом, каде што беше изгласан импичмент на 13 јануари, пак, се подготвени да ги предадат обвиненијата во Сенатот, каде што треба да почне судењето. Нивната цел беше Трамп да биде отповикан пред завршувањето на мандатот, но иако до тоа не дојде до 20 јануари, доколку сенаторите одлучат, можат да му забранат на Трамп повторно извршување на функцијата претседател на САД.
Во претставничкиот дом за импичментот гласаа 221 пратеник од Демократската партија и дури 10 републиканци, додека „против“ беа 197.
Трамп стана првиот претседател во историјата на САД за кого Претставничкиот дом двапати во мандатот му изгласал импичмент. Првиот беше во декември 2019. Тогаш тој беше обвинет дека ги злоупотребил своите овластувања за да изврши притисок врз Украина да ги испита Џо Бајден и неговиот син Хантер, поранешен член на одборот на украинска енергетска компанија, и дека ја опструирал истрагата во Конгресот во врска со тоа прашање. По судењето кое потоа следуваше во Сенатот, постапката заврши во полза на Трамп.