Мицкоски за средбите со Орбан и Јанша: Или ќе се задушиме во меѓусебни обвинувања или ќе тропнеме на вратите за поддршка

Како што најавија вчера од партијата, Мицкоски денеска од Скопје оди во Будимпешта на средба со унгарскиот премиер Виктор Орбан, а потоа во Љубљана и Загреб

Лидерот на ВМРО-ДПМНЕ Христијан Мицкоски, заедно со потпретседателот на партијата Александар Николоски, од денеска заминува во мини-дипломатска офанзива кај сестринските партии во регионот и во Европа.

Како што најавија вчера од партијата, Мицкоски од Скопје оди во Будимпешта на средба со унгарскиот премиер Виктор Орбан, по што следуваат Љубљана и Загреб.  

Мицкоски патува на средби со Јанша и со Орбан

Во интервју за „Дојче веле“, Мицкоски вели дека секоја средба има своја цел, но заедничко е тоа што на овие средби отворено ќе разговараат за блокираната европска перспектива на Македонија и за можноста тие да помогнат за придвижување кон европската иднина.

„Независно што ВМРО-ДПМНЕ е во опозиција, сметам дека треба да се искористи сиот расположлив потенцијал да се направи своевиден притисок и да се придвижиме кон патот на ЕУ. Имаме две опции – или да се задушиме во домашни обвинувања за тоа кој шири лажни вести, а кој ја говори вистината, па да се спроведува операција со која ќе се сака да се прикрие анексот на Договор за кој јавно говори Бугарија, а гледаме дека власта во Македонија моли Бога да не се дознае. Втората опција е да не чекаме, да тропнеме на вратите кои можеме да ги отвориме и да побараме поддршка за она што е заедничка стратегиска цел, а тоа е одблокирање на патот кон ЕУ“,

вели Мицкоски.

Како што вели Мицкоски во интервјуто, целта на средбите е да ги потврди добрите односи и соработката на ВМРО-ДПМНЕ со сестринските партии и поддршката која меѓусебно си ја даваат.