„Ви ветувам дека една од првите точки кои ќе ги разгледа новата влада на ВМРО-ДПМНЕ ќе биде штетниот договор за ГА-МА, за кој Владата на ‘Макпетрол’ му исплати 33 милиони евра“, најави вечерва лидерот на ВМРО-ДПМНЕ, Христијан Мицкоски. Според него, станува збор за штетен договор и затоа, рече тој, ќе има одговорност.
„И бидејќи гледам дека раководството на ‘Макпетрол’ ме споменува, ќе им испратам и ним порака, исто како и на луѓето од власта: Никогаш не ми била целта да влијаам или да ја диригирам уредувачката политика на Телма Телевизија, како што тврдат во своето соопштение, тоа го оставам на Заев. А ако имаат доказ за овие нивни тврдења јавно ги повикувам да ги објават, во спротивно стануваат телевизија на лажни вести и цензори на вистината“,
напиша Мицкоски на Фејсбук.
Власта на СДСМ и Зоран Заев го изгласа штетниот и по многу гледишта криминален закон за Макпетрол со кој од народната…
Posted by Hristijan Mickoski on Monday, December 28, 2020
Мицкоски регира на денешното усвојување на Законот за решавање на спорот помеѓу државата и „Макпетрол“, изгласан денеска од Собранието, со кој оваа компанија ќе добие 33 милиони евра за гасоводот.
Неговата партија преку коориднаторот на пратеничката група Никола Мицевски побара од претседателот на државата Стево Пендаровски да не го потпишува Указот за овој закон.
Мицкоски исто така, преку објавата на Фејсбук, им одговара на „Макпетрол“, од каде го обвинија Мицкоски дека се обидува да влијае врз уредувачката политика на Телма.
„Ги прашуваме пратениците од опозицијата, ако се толку многу загрижени за граѓаните во нашата држава, зошто експресно и без дискусија беше изгласан Законот за финансирање на политичките партии од буџетот на РСМ? Дали тука водеа сметка за парите и за потребите на граѓаните или за своите лични интереси? Јавноста во Државата треба да знае дека говорот на омраза и навредите упатени кон ‘Макпетрол’, ТВ Телма и нивното раководство од страна на пратениците на ВМРО-ДПМНЕ се последица на неостварената желба на нивниот лидер да влијае врз уредничката програма на ТВ Телма“,
велат од „Макпетрол“.