Директорката на Клиниката за инфективни болести вели дека минатата недела имало за 17 отсто помалку нови случаи
Во изминатите 24 часа во ковид-центрите во Скопје се хоспитализирани 27 нови пациенти поради компликации од коронавирусот. Со ова, вкупно 459 лица сомнителни и потврдени за ковид-19 се лекуваат на инфективните оддели во главниот град.
Во последното деноноќие на интерните клиники имало вкупно 9 приеми и тоа по двајца пациенти биле хоспитализирани на Клиниката за дерматологија и на Клиниката за гастроентерохепатологија, по еден пациент на ОРЛ и на Клиниката за неврологија и тројца на Очната клиника.
Во ковид-центарот во ГОБ „8 Септември“ се примени 8 нови пациенти, додека на Инфективната клиника во текот на вчерашниот ден се хоспитализирани 10 болни.
Голем дел од нив се на кислородна поддршка.
Во изминатите 24 часа дома се пуштени 35 оздравени пациенти
Во моментов на Кожната клиника во ковид-центарот се лекуваат 20 пациенти, на Клиниката за неврологија 29 болни, а на Институтот за ТБЦ се примени вкупно 40 пациент со симптоми на коронавирусот, во ковид-центарот на Клиниката за нефрологија во моментов се сместени 26 пациенти, на Клиниката за очни болести 13 пациенти, а на ОРЛ 21 лице. На Клиниката за Гастроентерохепатологија има 20 пациенти.
Во ГОБ „8 Септември“ има вкупно 105 болни, на Клиниката за инфективни болести има 141 пациенти, додека во Институтот за белодробни заболувања кај деца Козле има 44 пациенти.
Утрово до 8 часот имало 50 слободни места, а се очекува во тек на денот по направените исписи на оздравените пациенти да се ослободат и дополнителни места и на Клиниката за инфективни болести и во ГОБ „8 Септември“.
Минатата недела за 17 отсто помалку нови случаи
Директорката на Клиниката за инфективни болести Милена Стевановиќ во вчерашното гостување на „Топ тема“ на Телма истакна дека има лесно намалување на бројките, што се потврдува со фактот дека за речиси 17 проценти е намален бројот на новооткриени пациенти со ковид-19 во изминатата недела, а вчерашните бројки зборуваат за намалување и на процентот на позитивни во однос на тестираните, кој конкретно вчера изнесуваше 25 отсто.
„Тоа е нешто што навистина влева надеж. Од еден друг аспект гледано, на терен, не можеме да зборуваме дека бројките на клиниката се намалени, затоа што капацитетите се практично се уште речиси целосно исполнети. Но, она што ни дава надеж и се поклопува со бројките што ги покажуваат извештаите на Институтот за јавно здравје е дневната фреквенција на амбулантски прегледи која е за 20, па и речиси 30 отсто намалена во однос на претходната недела. И ако сме имале просек на пациенти 100-120 па и повеќе прегледи за 24 часа на клиниката, сега таа бројка е сериозно намалена. Тоа е она што остава впечатокот дека бројката лесно се намалува“,
рече д-р Стевановиќ.