Судот одреди триесет дена притвор за 54-годишен професор од Крушево, осомничен дека извршил полови дејствија врз негова ученичка на возраст на 15-годишна возраст.
„Осомничениот на 17.12.2020 година околу 10,00 часот, со злоупотреба на својата положба како професор во училиште во Крушево извршил полови дејствија врз негова ученичка на возраст од 15 години, која му била доверена заради учење. Кривичното дело осомничениот го сторил напаѓајќи го детето во училница, притоа оштетеното дете го оттурнало од себе и излегло од училницата“
соопшти обвинителството.
По поднесена кривична пријава од страна на полицијата, Основното јавно обвинителство Прилеп донесе Наредба за спроведување на истражна постапка против професорот поради постоење на основано сомневање дека го сторил кривичното дело – Обљуба со злоупотреба на положбата од член 189 став 2 од Кривичниот законик.
Јавен обвинител кој постапува во предметот до Судијата на претходна постапка при Основниот суд Прилеп поднесе предлог за определување мерка притвор против осомничениот. Предлогот беше прифатен, па Судот со решение на осомничениот му определи мерка притвор во траење од 30 дена.