Економијата може да страда, но животите на луѓето се бесценети, па затоа спасувањето човечки животи треба да има предност пред сè друго, нагласи македонскиот претседател
Претседателот Стево Пендаровски вчеравечер по средноевропско време се обрати на специјалната сесија на Генералното собрание на Обединетите нации, посветена на пандемијата на ковид-19.
Тој им се заблагодари на Обединетите нации и на Светската здравствена организација за лидерството во координирањето на напорите на глобално ниво за контрола и спречување на ширењето на ковид-19, како и на сите земји и организации кои ни дадоа поддршка со медицинска опрема и материјали, како и споделување на знаење и искуство.
„Пандемијата како системска закана бара системски одговор. Треба заедно да продолжиме да работиме за создавање издржливи, добро управувани, одговорни, отчетни здравствени системи кои им служат на граѓаните“,
рече Пендаровски.
На сесијата што се одржува во рамки на Генералното собрание на Обединетите нации зедоа учество над 150 шефови на држави, влади и министри.
„Пандемијата претставува и морален предизвик. Економијата може да страда, но животите на луѓето се бесценети, па затоа спасувањето човечки животи треба да има предност пред сè друго. Во исто време, нашите напори за контрола на ширењето на вирусот не смеат да бидат на штета на основните права и слободи. Ова подразбира здравствена заштита и економски стимул што треба да им се обезбедат на сите што имаат потреба. Борејќи се против коронавирусот, мора да осигураме дека не толерираме ширење вируси на расизам, екстремизам, дискриминација и ксенофобија“,
рече Пендаровски.