Околу дваесетина мажи, меѓу кои и дипломати и еден унгарски европратеник, биле фатени како со оргија ги прекршуваат полицискиот час и мерките против ширењето на ковид-19 во еден бар во центарот на Брисел, пишуваа тамошниот весник „ДХ“.
Според весникот, полицијата интервенирала откако соседите се пожалиле на бучава и прекршување на јавниот ред и мир доцна навечер во период кога во сила се полициски час и забрана за собирање.
Според пишувањата, полицијата на самото место фатила околу 25 голи мажи, а меѓу нив биле идентификувани и дипломати и еден европратеник. Според написите, европратеникот се обидел да избега преку прозорец, но се повредил и полицијата го привела. Подоцна, тој се повикувал на пратеничкиот имунитет, но, според написот, имунитетот не може да се активира ако европратеник е фатен во прекршок.
На социјалните мрежи се шпекулираше за името на унгарскиот пратеник. Се работи за Јозеф Сајер (59) еден од основачите на унгарската владејачка партија Фидес на премиерот Виктор Орбан.
???
— Asher Serrana ? ? (@AsherSerrana) December 1, 2020
József Szájer, Hungarian MEP and founding member of Fidesz was caught in an orgy with 25 people, mainly men, and drugs in Brussels this weekend. Fidesz is the party of Hungarian PM Orbán, protector of conservatism and actively fighting against our LGBTQ+ siblings. (1/x) pic.twitter.com/yHh6iVdIEi
Шпекулациите се поткрепуваат и со тоа што Сајер поднел оставка од пратеничката функција во Европскиот парламент во неделата со образложение дека одлуката ја носи по подолго размислување. Неговата оставка ќе стапи во сила на 31 декември годинава, а тој во дописот им се заблагодарил на гласачите што му овозможиле да ги претставува во ЕП.
Попладнево МИА јави дека Сајер, кој е познат како ултраконзервативен, денеска издал соопштение со извинување до семејството и гласачите поради учество на „приватна забава“.
Како што пренесуваат унгарски медиуми, Сајер ја доставил оставката во неделата до претседателот на ЕП, Давид Сасоли. Во образложението нагласил дека повлекувањето од функцијата европратеник не е поврзана со тековната дебата на европската сцена и истакнал дека ја поддржува позицијата на унгарската влада.
Сајер, еден од основачките членови на десничарската Фидес, во оставката вели дека учеството во дневната политичка борба за него подолго време претставувало „зголемен ментален напор“.
Овој скандал доаѓа во период кога во Унгарија повторно се дискутира за правата на ЛГБТ-заедницата и новиот нацрт-закон што владата на Орбан го предложи, со кој се забранува истополови бракови да посвојуваат деца.
Десничарската влада на Унгарија, исто така, предложи уставен амандман со кој се бара децата да бидат воспитувани врз основа на христијанско толкување на родовите улоги. Во моментов, во Унгарија можноста за посвојување на деца од страна на истополови бракови е возможно само ако едниот партнер се пријави како самохран родител. Според новите одредби на предлог-законот, Унгарија би признала семејства засновани на брак, исклучиво ако „мајката е жена, а таткото е маж“.
Засега, од Европскиот парламент не коментираат за случајот со оргијата, а медиумите пишуваат дека лицата биле казнети за прекршување на мерките против ковид-19.
Белгија на почетокот на минатиот месец најави второ затворање на земјата со порестриктивни мерки, меѓу нив и полициски час и забрана за групирање на повеќе од четири лица.