Ваквата стапка на раст досега не е регистрирана во историјата, врз основа на постоечките записи
Глобалното ниво на јаглерод диоксид (СО2) во атмосферата и натаму останува рекордно високо, и покрај затворањето на економиите и општествата поради пандемијата со коронавирусот, се наведува во последниот извештај на Светската метеоролошка организација (СMO).
Според научниците, затворањето на економиите поради пандемијата од ковид-19 довело до намалување на емисиите на многу загадувачи и предизвикувачи на ефектот на стаклена градина, но тоа има незначително влијание врз вкупната концентрација на јаглерод диоксид.
Метеоролошката организација на ОН предупредува дека глобалната просечна концентрација на јаглерод диоксид во 2019 година го пробила прагот од 410 честички на еден милион (ppm), а и продолжува да расте и во 2020 година.
„Глобалниот праг од 400 ppm го пробивме во 2015 година и само четири години подоцна надминавме 410 ppm“,
констатира генералниот секретар на СМО, Петери Таалас.
Она што е вознемирувачко, според него, е што ваквата стапка на раст досега не е регистрирана во историјата, врз основа на постоечките записи.
„Падот на емисиите поврзани со затворањето на општествата е само мала трага на долгорочниот графикон. Потребно ни е континуирано исправање на кривата“,
рече Таалас.
Според него, пандемијата на ковид-19 не е решение за климатските промени, туку нуди платформа за поодржливо и поамбициозно дејствување за намалување на емисиите и целосно трансформирање на индустриските, енергетските и транспортните системи.