Франција и Германија воведуваат одреден вид карантин, Шпанија воведе вонредна состојба и полициски час
Двете најголеми економии во Европа, Франција и Германија, воведуваат некаква форма на национален карантин, како резултат на порастот на нови случаи на заразени со коронавирус и на смртни случаи.
Од петок во Франција ќе биде дозволено напуштање на домот само ако се работи за неодложна работа или поради здравствени причини.
Претседателот Емануел Макрон рече дека земјата е во опасност од втор бран, кој „без сомнение ќе биде потежок од првиот“.
Во меѓувреме, Германија воведува еден вид „мек“ карантин на национално ниво – мерките што стапуваат во сила в понеделник и ќе траат до крајот на месецот се помалку строги отколку во Франција, но и тие вклучуваат затворање ресторани, барови, спортски сали и театри.
Причина за вклучување на алармот во Европа е порастот на бројот на заболени и на починати, како последица на ковид-19.
„Длабоко сме во вториот бран. Мислам дека оваа година ќе имаме поинаков Божиќ“,
рече претседателката на Европската комисија Урсула фон дер Лајен.
Ново истражување во Англија покажува дека речиси 100 000 луѓе секојдневно се заразуваат, правејќи притисок врз владата да ја смени досегашната политика со регионален пристап.
Студијата спроведена од Империјал колеџ во Лондон, вели дека темпото на епидемијата се забрзува и проценува дека бројот на заразени сега се удвојува на секои девет дена.
Авторите велат дека сме во критична фаза и дека нешто мора да се промени.
Национален карантин во моментов е во сила во Велс, додека Северна Ирска ги заостри ограничувањата, како затворање на училиштата, а Шкотска најави дека наскоро ќе објави детали за мерките на сите нивоа.
Експертите предупредуваат дека од пролетта Велика Британија брзо се приближува до врвот на заразени.
Во Франција, бројот на дневните смртни случаи како последица од ковид се на највисоко ниво од април досега – вчера се потврдени 36 437 нови случаи и 244 смртни случаи.
Германските здравствени власти денеска соопштија дека 89 лица починале во изминатите 24 часа, со рекордни 16 774 новозаразени.
Високи бројки – различни мерки
Првиот бран на вирусот на почетокот на оваа година силно погоди некои делови од Европа, додека другите области успеаја да го избегнат најлошото.
Но, и покрај ваквиот пораст низ цела Европа, не сите земји се одлучуваат за мерката карантин.
Италија, која беше епицентар во Европа на почетокот на првиот бран на вирусот, веќе воведе нови ограничувања што ќе бидат во сила за еден месец.
Сите барови и ресторани низ целата земја треба да затворат до 18 часот, целосно се затвораат спортските сали, базените, театрите и киносалите, но музеите можат да бидат отворени. Забранети се собири за секаков вид прослави – свадби, крштевки и погреби.
За училиштата и фирмите, оваа мерка не важи, иако многу средни училишта најавија дека ќе преминат на учење на далечина.
Шпанија од 25 октомври воведе полициски час на национално ниво откако владата прогласи нова вонредна состојба. Жителите на сите региони, со исклучок на Канарските Острови, мора да останат дома од 23 до 6 часот.
Но, според Европскиот центар за превенција и контрола на болести, најлоша стапка на инфекции на континентот има Чешка со 1 448 случаи на 100 000 жители во текот на 14 дена, но оваа земја и покрај сѐ воведе делумен карантин.
Белгија, која е втор на оваа непопуларна листа во Европа, објави најголем број на нови хоспитализирани од врвот на епидемијата во април. Според овие податоци, во болницата има 5 924 пациенти со ковид, од кои 993 се на интензивна нега. Во обраќањето до нацијата вчеравечер, премиерот Александар де Кро ја опиша ситуацијата како „критична“.
Поради влошување на ситуацијата, и Република Ирска на почетокот на овој месец воведе втор карантин на национално ниво од почетокот на пандемијата, кој ќе трае шест недели.