Нивниот ангажман ќе биде помош во телефонска комуникација со пациентите, изработка на епидемиолошки анкети и обработка на податоците
Студентите од шеста година по општа медицина ќе им помагаат на своите колеги во справување со ситуацијата со коронавирусот. Ова е договорено денеска на средбата на министерот за здравство Внко Филипче и деканката на Медицинскиот факултет Соња Топузовска со идните лекари.
Нивниот ангажман ќе биде помош на колегите епидемиолози во телефонска комуникација со пациентите, изработка на епидемиолошки анкети и обработка на податоците.
„Во услови кога се соочуваме со најголемата светска здравствена криза, студентите по медицина, иднината на нашето здравство, активно се вклучува во поддршка на своите колеги. Студентите се едногласни дека сакаат и можат да помогнат во периодот што следува“,
рече Филипче и додаде дека тие нема да имаат физички контакт со пациенти заболени или суспектни на ковид-19.
Според деканката Топузовска, вклучувањето на студентите по медицина во борбата против ковид-19 е директна помош на здравствените работници и здравствениот систем кои го носат најголемиот товар во оваа криза. Дополнителна придобивка е што студентите освен што ќе стекнат искуство преку овој ангажман ќе ја реализираат клиничката пракса по јавно здравје која ја извршуваат во шестата година од студиите и таа ќе им биде признаена.
Ангажманот на студентите ќе трае шест месеци и ќе биде поделен во три фази. На секои два месеца по 50 нови студенти ќе бидат ангажирани во Центрите за јавно здравје.
Од Министерството за здравство соопштија дека во тек е координацијата и распределбата на групите е во тек, ангажманот на студентите ќе започне во најкус можен рок.
Од почетокот на пандемијата, здравствените работници во повеќе наврати алармираа дека се соочуваат со недостиг на кадар, што е особено видливо во периодите кога има пораст во бројот на заразените и хоспитализираните, како што е тоа сега.