Хаси тогаш имала 15, а Вајтинг 16 години. Според тужбата, Зефирели им покажал каде ќе биде поставена камерата и ги уверил дека голотијата нема да биде фотографирана или објавена во филмот. Во тужбата се наведува дека тој бил нечесен и дека Вајтинг и Хаси всушност биле снимени голи без нивно знаење
Речиси 55 години откако Франко Зефирели беше номиниран за „Оскар“ за адаптацијата на „Ромео и Јулија“, ѕвездите на филмот го тужат „Парамаунт пикчрс“ (Paramount Pictures) за повеќе од 500 милиони долари поради голотија.
Оливија Хаси и Леонард Вајтинг беа само тинејџери кога ја наелектризираа публиката во верзијата на Франко Зефирели на „Ромео и Јулија“ од 1968 година. Филмот беше хит и беше номиниран за четири „Оскари“, но исто така предизвика контроверзии за сцената во спалната соба, која ги вклучуваше задниот дел од телото на Вајтинг и голите гради на Хаси.
Сега во своите 70-ти години, Хаси и Вајтинг во петокот поднесоа тужба во Врховниот суд во Санта Моника обвинувајќи го „Парамаунт“ за сексуална експлоатација и дистрибуција на снимки со разголена содржина на адолесцентни деца.
Во тужбата се наведува дека Зефирели, кој почина во 2019 година, ги уверил двајцата актери дека нема да има голотија во филмот и дека ќе носат долна облека во боја на кожа во сцената во спалната соба. Но, во последните денови од снимањето, режисерот наводно ги молел да настапат голи со нашминкано тело со изговор дека инаку филмот ќе пропадне.
Хаси тогаш имала 15, а Вајтинг 16 години. Според тужбата, Зефирели им покажал каде ќе биде поставена камерата и ги уверил дека голотијата нема да биде фотографирана или објавена во филмот. Во тужбата се наведува дека тој бил нечесен и дека Вајтинг и Хаси всушност биле снимени голи без нивно знаење.
„Она што им беше кажано и она што се случи беа две различни работи. Му веруваа на Франко. На 16 години, како актери, веруваа дека тој нема да ја наруши довербата што ја имаа. Франко беше нивни пријател и, искрено, на 16 години што требаше да прават? Немаа опции. Немаше движење #MeToo“,
рече Тони Мариноци, кој е бизнис-менаџер на двајцата актери.
Според жалбата, Хаси и Вајтинг претрпеле душевна болка и емоционална вознемиреност во 55-те години од објавувањето на филмот, а исто така ги загубиле можностите за работа. И покрај нивните успешни настапи, Хаси и Вајтинг имаа многу ограничени актерски кариери по „Ромео и Јулија“. Тие бараат отштета за која се верува дека надминува 500 милиони долари.
„Сликите со голотија на малолетници се нелегални и не треба да се прикажуваат. Тие беа многу млади наивни деца во 60-тите кои не сфаќаа што ќе ги погоди. Одеднаш станаа познати на ниво што не го очекуваа и беа злоупотребувани на начин со кој не знаеле како да се справат“,
изјави адвокатот на актерите, Соломон Грисен.
Тужбата делумно се потпира на законот во Калифорнија кој привремено го суспендира статутот на ограничувања за тужбите за сексуална злоупотреба на постари деца, а судовите забележаа прилив на жалби против извидниците на Америка и Католичката црква, меѓу другите организации.