Оттаму прашуваат и како е можно министерот за здравство Арбен Таравари да тврди дека договорот со компанијата ќе биде на 7-8 години, а дека потоа Клиничкиот центар нема да биде таму, кога пред неколку недели од Владата потврдиле дека нов Клинички центар нема да се гради
Итно да се објави повикот за изградба на паркингот на Клиничкиот центар во Скопје, како и физибилити студијата според која е распишан тендерот, бараат денеска од Социјалдемократскиот сојуз и посочуваат дека е потребна целосна транспарентност за тоа дали штетниот договор со компанијата „Ѓока констракшн“, бил однапред подготвуван.
„Не е јасно кој повеќе лаже, дали Мицкоски или Таравари во однос на случајот со паркингот на Клиничкиот центар. Нивните изјави за давање на паркингот на Клинички на стопанисување на ‘Ѓока Констракшн‘, со што 99 отсто од добивката ќе оди кај албанска компанија, а само 1 отсто ќе остане на државата се контрадикторни и јасно укажуваат на тоа дека зад оваа зделка се крие сомнителен договор“,
се вели во соопштението од опозициската партија.
Оттаму прашуваат како е можно министерот за здравство Арбен Таравари да тврди дека договорот со компанијата ќе биде на 7-8 години, а дека потоа Клиничкиот центар нема да биде таму, кога пред неколку недели од Владата потврдиле дека нов Клинички центар нема да се гради.
„Тоа значи дека Клиничкиот центар ќе остане на иста локација. Зошто Таравари ја лаже јавноста и се обидува да ги ублажи критиките со вакви изјави. Ова јасно покажува дека тој добро знае дека договорот е штетен, но сака што полесно да помине во јавноста“,
Според партијата, се отвора и прашањето дали премиерот Христијан Мицкоски намерно остава простор за потпишување на договорот кога вели дека предвид се зема тендерската спецификација, како и дека се подразбира оти фирма што нема кредибилитет, бонитет, ниту технички карактеристики, нема да биде избрана на тендерот.
„Дали тоа значи дека ако фирмата има бонитет и кредибилитет, овој скандалозен договор треба да се потпише? Зошто Мицкоски не го отфрли веднаш, туку се двоуми? Дали и тој е дел од оваа зделка?“,
Од СДСМ прашуваат и како е можно тендерската процедура да е завршена, а сè уште да не се знае дали фирмата ги исполнува критериумите за бонитет, кредибилитет и реноме.
„Што правеле во Министерството за здравство за време на тендерската постапка? Зошто Владата не ја објави физибилити студијата? Што крие? Владата мора да го објави и официјалниот повик на тендерот. Ако договорот се уште не е потпишан, јавноста треба да иди како точно било формулирано барањето од Министерството за здравство и дали веќе во оваа фаза се подговотвувал овој штетен договор“,
велат од СДСМ.
Премиерот пред неколку дена изјави дека Владата нема донесено одлука која фирма ќе управува со паркингот во Клиничкиот центар Скопје и дека не знае од каде е информацијата дека тоа е албанската „Ѓока констракшн“. Посочи дека при изборот на фирма што преку јавно-приватно партнерство ќе гради и ќе управува со паркингот во Клинички центар во Скопје ќе се земат предвид бонитетот и кредибилитетот на компанијата.
Во врска со прашањето за јавно-приватно партнерство за паркингот на Клиничкиот центар „Мајка Тереза“, министерот за здравство Арбен Таравари изјави дека договорот со единствената фирма пријавена на тендерот ќе биде потпишан доколку по првичната помината процедура помине уште неколку филтри.
„Договорот не е потпишан. Паркингот на Клиничкиот центар секогаш прави нервоза. Секогаш ми значи мислењето на јавноста, таа што ќе каже, ако ми кажат дека не е нешто во ред, но и ако од Владата кажат дека има одредени пропусти, нема да имаме ништо. Ќе го поништиме тендерот, ќе објавиме нов, но само ќе изгубиме една година“,
Дека компанијата „Ѓока констракшн“ од Албанија преку јавно-приватно партнерство ќе стопанисува со паркингот на Клиничкиот центар „Мајка Тереза“, Таравари претходно потврди за БИРН.
На огласот, кој беше распишан на 15 ноември, се јавила само „Ѓока констракшн“. Компанијата е формирана во Тирана во 1994 година, од 2022 има регистрирано подружница и во Скопје.
Како што објави „360 степени“, во огласот се превидува приватниот партнер да изгради две катни монтажни гаражи, да стопанисува со целиот паркинг на Клинички, а за возврат државата да добие еден отсто од вкупните остварени годишни приходи.
Владата на седница во август минатата година донесе одлука да се градат монтажни катни гаражи на Клиничкиот центар со јавно-приватно партнерство и формираше Комисија за спроведување на постапката.
Сега со паркингот на Клинички стопанисува ЈП „Градски паркинг“ Скопје.
