Од Здружението на новинари појаснуваат дека водичот треба да служи како пример, пред сè за владините службеници, кои, како што додаваат, во неколку наврати на одвоени прес-конференции имаа несоодветна комуникација со дел од новинарите
Здружението на новинари на Македонија (ЗНМ) денеска објави низа насоки и препораки до политичарите и носителите на јавни функции кои се однесуваат на тоа како треба, односно не треба да комуницираат со новинарите во моменти на трагични настани како актуелниот во Кочани.
Од ЗНМ појаснуваат дека водичот треба да служи како пример, пред сè за владините службеници, кои, како што додаваат од Здружението, во неколку наврати на одвоени прес-конференции имаа несоодветна комуникација со дел од новинарите. Оттаму велат оти ваквата комуникација не смее да стане пракса, а на прашањата на новинарите кои се глас на јавноста треба да се одговара постојано и отворено.
Во листата на ставки кои политичарите не треба да ги прават, од ЗНМ наведуваат:
„Не покажувајте ароганција и незаинтересираност (не бидете одбивни, нетрпеливи или иритирани, избегнувајте сарказам, превртување на очи или покажување на надмоќност, не ја минимизирајте трагедијата и не префрлајте вина на други). Не прикривајте информации и не избегнувајте одговори (не одговарајте со нејасни и празни фрази, ако одредени информации сè уште не се достапни, кажете го тоа отворено наместо да бегате од прашањата, не давајте погрешни или контрадикторни информации – тоа создава недоверба и шпекулации). Не ja користете трагедијата за политички маркетинг (ова не е време за политички поени или ПР настапи, не ветувајте нешто што не можете да го исполните, не ја користете трагедијата за напад на политички противници. Не ги обвинуваjте јавноста, медиумите или жртвите (не сугерирајте дека жртвите сами си се виновни, не напаѓајте новинари дека ‘ширеле паника’ само затоа што поставуваат тешки прашања, медиумите имаат право да информираат – почитувајте ја нивната улога.“
Освен листа на препораки како не треба, ЗНМ објави ставки како политичарите и носителите на јавни функции треба да се однесуваат со новинарите за време на трагични настани.
„Покажете емпатија и човечност (изразете сочувство искрено, а не само со подготвени изјави, покажете разбирање и почит кон семејствата на жртвите, вашиот тон и говор на телото треба да одразуваат загриженост). Бидете транспарентни и давајте јасни информации (споделувајте точни информации на време, дури и ако се ограничени, објаснете што се знае, што се истражува и кога ќе следуваат нови информации, ако се направени грешки, признајте ги и објаснете како ќе бидат исправени). Почитувајте ги новинарите и нивните прашања (одговарајте директно и не покажувајте непријателски став, дозволете дополнителни прашања и покажете трпение, ако нешто не знаете, признајте го тоа, наместо да шпекулирате). Објаснете ги следните чекори без да ја политизирате трагедијата (кажете кои итни мерки се преземаат за да се реши ситуацијата, смирете ја јавноста со факти, а не со празни ветувања, фокусот треба да биде на жртвите и нивните семејства, а не на политички интереси“,
наведуваат од ЗНМ.