Признание за посебен придонес во промоцијата на професионалното истражувачко новинарство им беше доделено и на новинарите Александар Димитриевски и Михаил Милошевски од „360 степени“ за серијата прилози за Бојан Христовски
Здружението на новинарите на Македонија (ЗНМ) денеска ги додели годишните награди, оддавајќи признание на најистакнатите новинари и медиумски професионалци.
Наградата за животно дело „Крсте Петков Мисирков“ му припадна на Ѕвездан Ѓорѓиевски, како признание за неговиот траен придонес во македонското новинарство.
Наградата за истражувачко новинарство „Јашар Еребара“ ја доби Истражувачката Репортерска Лабораторија (ИРЛ) за сторијата „Службеничка од пошта ги штитела централите на ЕСМ од пепел, ‘пеплосан’“, а наградата за најдобро новинарско известување на локални и регионални теми му припадна на Фисник Џелили од „Порталб.мк“ за сторијата „Насилството меѓу учениците – сериозен аларм во Тетово“.
Доделени беа и признанија за посебен придонес во промоцијата на професионалното истражувачко новинарство.
Признание им беше доделено на новинарите Александар Димитриевски и Михаил Милошевски од „360 степени“ за серијата прилози на тема – Бојан Христовски, поседува сертификат за познавање на англиски јазик од студио/училиште кој датира од период во кој издавачот на сертификатот ниту остварувал приходи (не работел), ниту пак бил на листата правни субјекти.
Признание доби и телевизискиот истражувачки магазин „Код“ за сторијата: „Тендерите во лотарија за набавка на видеотерминали и милионите евра”,
За првпат од своето основање, ЗНМ годинава воспостави награда за најдобар снимателски продукт од јавен интерес која за 2024 година му припадна на Иван Поповиќ за прилогот „Климатски миграции: Преспа во трка со времето да ја зачува водата“, објавено на платформата „doma.edu.mk“.
Наградата за најдобра камера и филмско изразување, пак, ја зеде снимателот од ИРЛ, Трајче Антоновски, за сторијата „Украдени животи“.
Комисјата за награди беше во состав на Герман Филков, Душица Мрѓа и Сенат Зулбеари, а за категоријата сниматели дополнително и Зоран Догов и Сашо Доковски.