Министерот за здравство Венко Филипче и партијата СДСМ, на која тој припаѓа, избраа да ми го ограничат правото на изразување и почнаа кампања за одмазда, вели д-р Арбен Зибери во врска со разрешувањето од директорската позиција во Центарот за јавно здравје Скопје.
Министерството за здравство денеска информираше дека е разрешен Зибери поради пласирање неточни изјави во јавноста, со што директно наштетил на угледот на членовите на Комисијата за заразни болести доведувајќи го во прашање кредибилитетот на здравствените институции во борбата со коронавирусот.
Во изјава за „360 степени“, Зибери вели дека ваквата одлука на министерот Филипче е ограничување на правото на изразување.
„Ѝ служев на оваа земја и на нејзините граѓани со голема лојалност и посветеност. Секој што ме знае мене и ја познава мојата работа, го знае тоа. За жал, министерот за здравство и партијата СДСМ, на која тој ѝ припаѓа, избраа да ми го ограничат правото на изразување и почнаа кампања за одмазда. Однесувањето на СДСМ е голем срам. Очекував поголем интегритет и повеќе морално однесување од луѓе кои целат да ја водат оваа држава!“,
вели Зибери.
Разрешувањето на Зибери уште вчера го најави министерот Филипче, како одговор на фејсбук-статусот на Зибери во кој напиша дека помогнал да се отворат границите за да може дијаспората да дојде и да гласа за премиер Албанец, а притоа за влез да нема услови како негативен ПЦР-тест и самоизолација.
На денешната прес-конференција на министерот за здравство Венко Филипче ги отфрли наводите дека одлуката за разрешувањето на Зибери е со политичка заднина и доаѓа во моменти кога неговиот чичко, Насер Зибери, е кандидат за прв премиер Албанец. Филипче посочи дека нема да дозволи никој политички да поентира од кризата.
„Во целиот овој изминат период во којшто, практично, целокупниот здравствен систем е посветен на решение на проблемите коишто произлегуваат од кризата со ковид-19 имаше и други разрешувања. Тројца директори беа претходно разрешени, ова е четврти. Нема да дозволам никој да ја политизира оваа стручна работа на Комисијата за заразни болести. Нема да дозволам никој политички да поентира, затоа што овие луѓе 4 месеци, практично без прекин работат посветено, со цел да се заштити здравјето на граѓаните“,
рече Филипче.
Министерството за здравство денеска информираше дека за нов в.д. директор на Центарот за јавно здравје Скопје е назначен д-р Александар Стојанов.