Полицијата првично рече дека луѓето се убиени и ранети откако, наводно, очевидци виделе човек со лак и стрела. Оттаму сега појаснуваат дека, иако лак и стрела биле користени непосредно пред нападот, напаѓачот сепак ги фрлил пред луѓето да бидат убиени
Жртвите во неодамнешниот напад во Норвешка не се убиени со лак и стрела, како што претходно се мислеше, објави денеска норвешката полицијата.
Пет лица беа убиени минатата среда во Консгберг во близина на Осло, а најмалку тројца други беа тешко повредени.
Полицијата првично рече дека луѓето се убиени и ранети откако, наводно, очевидци виделе човек со лак и стрела. Оттаму сега појаснуваат дека, иако лак и стрела биле користени непосредно пред нападот, напаѓачот сепак ги фрлил пред луѓето да бидат убиени.
„Кога обвинетиот дојде во Хитегат, тој веќе немаше лак и стрела. Во Хитегат беа убиени пет лица со оружје што може да нанесе убодни рани. Некои беа убиени во нивниот дом, а некои на јавно место“,
се вели во денешното соопштение на норвешката полиција, пренесува „Еуроњуз“.
Полицијата го запленила оружјето што може да се поврзе со нападите, но одби да даде подетални информации поради тоа што, како што наведува, сѐ уште има сведоци и жртви кои не се испрашани.
Еспен Андерсен Братен беше уапсен кратко време по нападот и ги призна убиствата.
Нему му беше одреден притвор од четири недели, од кои две во самица и му беше забрането секаква комуникација. Данскиот државјанин (37) е обвинет за три убиства и пет обиди за убиство.
Полицијата претходно соопшти дека е можно да станува збор за психички нестабилна личност.