Жители на скопско Ново маало, со петиција од 330 потписи, бараат Општина Центар да му даде одобрение за градба на инвеститорот за што поскоро да почне изградбата на кулите спроти „Холидеј ин“. Петицијата денеска освен до Општината ја доставија и до Владата, со предупредување дека ќе протестираат и ќе тужат ако не се исполни нивното барање.
„Бараме Општина Центар, или која било друга институција, воопшто да не помислува да го суспендира планот. Ако тоа се случи, ние жителите на Ново Маало сме подготвени да излеземе на протест. Никој никому не смее да ускратува право на нормален живот, за кој ние со години се бориме. А тие што бараат планот да се суспендира нека дојдат да живеат во нашите трошни куќи, кои не можевме ниту да ги реновираме, со задоволство ќе се замениме со нивните удобни станови“,
соопштија жителите на Ново Маало.
Дел од жителите добиле ветување од инвеститорот за обесштетување, иако првичниот проект за градба, кој беше презентиран од архитектите и од „МГ фешн“, се однесува на парцела 1, која не ги опфаќа куќите.
„Сметаме дека никој нема право да одлучува за тоа како ние ќе живееме. Нема да дозволиме поради нивните неразумни барања да останеме да живееме во супстандардни услови, прокиснати кровови, септички јами, нерешено греење и депонија за отпад. На сите оние што реагираат дека овој простор ќе стане бетонска џунгла и заслужува зеленило, им укажуваме дека сега освен калдрма по сокаци, кал до колена и распукан бетон на паркинг нема ништо друго“,
се наведува во петицијата.
Наспроти барањата на дел од жителите од Ново Маало, сѐ погласни се апелите на десетици граѓански здруженија, професори и архитекти кои бараат да се суспендираат деталните урбанистички планови кои не се во согласност со Генералниот план.
Општина Центар сѐ уште не се изјаснува како ќе постапи за спорниот ДУП, кој беше под мораториум затоа што не е во согласност со Генералниот урбанистички план. Објаснувањето на градоначалникот Саша Богдановиќ е дека стравува од штетите што би настанале ако не побараат суспензија, а потоа не успеат да донесат нов ДУП. Во меѓувреме, тече рокот за издавање одобрение за градба на инвеститорот кој веќе поднел барање електронски.