Пред седиштето на Општина Центар е спроведена герила-акција. На оградата од дворот на општинската зграда е поставен транспарент со содржина „Потпис на одобрение = потпис на оставка“.
Герила-акцијата доаѓа во период кога во фокусот на јавноста е парцелата спроти хотелот „Холидеј ин“ каде што според Деталниот урбанистички план (ДУП), кој не е усогласен со Генералниот урбанистички план (ГУП), е предвидено да се градат висококатници.
Патот за изградба на висококатниците се отвори откако мораториумот на плановите во Центар „падна“ на Уставен суд, а неодамна инвеститорите го претставија проектот и уплатија дел од комуналиите за градба. Многумина жители, како и голем дел од стручната јавноста, се против изградбата, која, како што посочуваат, може да се спречи доколку наместо одобрение за градба, градоначалникот го суспендира ДУП-от.