Евроамбасадорот Жбогар пред завршување на неговата мисија во земјава, во интервју за „360 Степени“ одговараше на прашање за тоа на што би ја фокусирал својата енергија и напори во наредните месеци и години, со цел да обезбеди што е можно побрза интеграција на земјата во ЕУ, кога би бил премиер на Северна Македонија.
„За ваша и за моја среќа, јас не сум во таква позиција. Мислам дека вашите политичари знаат најдобро што треба да се направи. Европската интеграција не е процес што е изолиран или што опстојува сам за себе. Се што сакаме да направиме, се што очекуваме е „сопствената куќа да си ја доведете во ред“. Тоа значи дека ќе обезбедите подобар живот за граѓаните, дека младите нема да бидат принудени да ја напуштаат земјата, дека се почитува владеењето на правото, дека се заштитува животната средина, дека се заштитуваат правата на граѓаните од ранливите категории… Сето тоа е европска интеграција, исто како што очекуваат и вашите граѓани. Европската интеграција е само дополнителен мотор што и помага на земјата сите овие работи побрзо да ги заврши. Како правило, мислам, процесот оди побрзо ако имате единство во земјата, ако сите туркаат во иста насока. Оттука, многу е важно сите партии застапени во парламентот да ја поддржат европската интеграција и ќе биде значајно да се создаде некакво единство за оваа стратешка цел – зачленување во ЕУ. Мислам дека владата треба да се фокусира на тоа. Една работа е да се има желба да се влезе во ЕУ, а друго е тоа да го направите цел и да бидете решени да ја остварите целта. Ако само посакувате и чекате, тогаш тоа може да се случи, но може и да не се случи. Затоа треба да бидете решени, посветени, треба да ги ангажирате сите сили, сиот талент што го имате во земјата и тогаш, според мене, шансите за успех се поголеми. Мислам дека обединети сте посилни и побрзо ќе се движите“,
вели Жбогар.
Запрашан за тоа дали гледа итни приоритети, Жбогар вели дека владеењето на правото е секогаш итен приоритет.
„Во сите преговори за членство владеењето на правото е најзначајниот елемент. Немаме некои посебни приоритети во однос на приоритетите на вашите граѓани и би очекувал дека за граѓаните владеењето на правото, чувството за владеење на право е приоритет, чувството на еднаквост, дека сите се еднакви пред законот, најверојатно, е приоритет“,
вели Жбогар.