За една недела во периодот од 27 јули до 2 август, регистрирани се вкупно 912 нови позитивни случаи од 28 градови во земјава. Во тој период направени се вкупно 9 709 тестови во лабораториите во кои се вршат молекуларни тестови за прируство на САРС-КоВ-2 или ковид-19.
Според неделниот извештај на Институтот за јавно здравје има намалување за 4,6 отсто заразени во споредба со претходната недела.
Податоците покажуваат дека регистрирани се лица во сите возрасни групи, а засега е најзастапена возрасната група на лица над 60 години, осносно вкупно 209 или 22,9 отсто.
Поголем број на заболени се регистрира и кај лицата на возраст од 30-39, вкупно 177 или 19,4 отсто. Од 40 до 49 години регистрирани се 163 позитивни лица или 17,9 отсто, а во возрасната група од 50-59 години регистрирани се 162 позитивни лица или 17,8 отсто.
„Најмал број е регистриран кај децата од 0-9 години, вкупно 28 деца или 3,1 отсто и од 10-19 години регистрирани се 46 лица или 5,0 отсто“,
се вели во извештајот на ИЈЗ.
Во однос на дистрибуцијата по пол, пријавени се 431 лица од женски и 481 од машки пол.
Од случаите кои се епидемиолошки истражени околу 94,3 отсто, регистрирани се 15,7 отсто хоспитализирани, а кај 32,2 отсто лица е регистрирано присуство на коморбидитети.
Од вкупниот број на регистрирани лица со ковид-19 во последната недела, 328 имале контакт со потврден случај, а 21 лице патувале во странство во изминатите две недели.
Од 27 јули до 2 август, вкупно 1 032 лица се водат за оздравени со два негативни теста.
Пријавени се 29 смртни случаи од 11 градови, што е намалување од 14,7 отсто во однос на минатата недела. Најголем дел од нив се на возраст над 60 години. Од починатите, 24 биле хоспитализирани, а пет починале во вонболнички услови. Коморбидитети се регистрирани кај 23 починати лица.