Построги мерки за кинеските турусти веќе донесоа Јапонија, Малезија, Тајван и Индија, додека Соединетите Американски Држави соопштија дека и тие размислуваат околу воведување на нови правила за лицата кои доаѓаат од оваа земја. По речиси три години ограничувања, Кина од 8 јануари следната година ќе ги отвори границите и ќе им дозволи на своите државјани полесно да патуваат. Одлуката на Пекинг доаѓа во време кога земјата се соочува со пораст на случаите на ковид
Италија е последната во редот земји во светот што воведе задолжителни тестови за ковид за кинеските туристи, откако Пекинг објави дека од следната недела повторно ќе ги отвори своите граници по строгите анти-ковид мерки што земјата ги спроведуваше од почетокот на пандемијата, пишува Би-би-си.
Построги мерки за кинеските турусти веќе донесоа Јапонија, Малезија, Тајван и Индија, додека Соединетите Американски Држави соопштија дека и тие размислуваат околу воведување на нови правила за лицата кои доаѓаат од оваа земја.
По речиси три години ограничувања, Кина од 8 јануари следната година ќе ги отвори границите и ќе им дозволи на своите државјани полесно да патуваат.
Одлуката на Пекинг доаѓа во време кога земјата се соочува со пораст на случаите на ковид.
Тоа доведе до претпазливост кај некои земји, на што властите во Пекинг одговорија дека правилата за коронавирус треба да се донесат на „научна“ основа и обвини некои земји и медиуми дека ја „подгреваат“ситуацијата.
Во понеделникот и вторникот, Кина објави дека ќе ги олесни ограничувањата за патување до и од земјата.
Од 8 јануари ќе заврши карантинот за патниците кои влегуваат во Кина, а апликациите за пасоши за кинеските граѓани ќе продолжат, соопштија тамошните власти.
По одлуката на властите во Пекинг веб-сајтовите за патување пријавија скок во сообраќајот, што е причина некои земји да ги ревидираа своите правила за патување.
Италија која беше глобален епицентар на вирусот откако тој се прошири од Кина кон крајот на 2019 и 2020 година соопшти дека воведува задолжително тестирање за ковид за сите патници кои доаѓаат од Кина.
Министерот за здравство Орацио Скилачи рече дека ова е „од суштинско значење за да се обезбеди надзор и идентификација“ на која било нова варијанта на вирусот и да се „заштити италијанското население“.
Пред неговата најава, надлежни служби на аеродромот во Милано веќе ги тестираа патниците што пристигнуваа од Кина.
На еден лет, кој пристигнал на градскиот аеродром „Малпенса“ на 26 декември, било откриено дека 52 отсто од патниците биле позитивни на ковид, пренесува италијанскиот весник „Ла Република“.
Други земји веќе воведоа одредени ограничувања за патниците кои доаѓаат од Кина.
Во Јапонија, од петок сите патници од Кина и оние кои ја посетиле оваа земј во рок од седум дена ќе бидат тестирани за ковид по пристигнувањето, изјави премиерот Фумио Кишида. Оние кои ќе бидат позитивни ќе треба да бидат во карантин седум дена ако имаат симптоми или пет дена ако се асимптоматски. Ќе биде ограничен и бројот на летови до и од Кина.
Во Индија, лицата кои патуваат од Кина и четири други азиски земји мора да направат негативен тест за ковид пред да пристигнат. Патниците ќе бидат ставени во карантин доколку имаат симптоми или чии тестови ќе покажат дека се позитивни на вирусот.
Тајван соопшти дека луѓето кои пристигнуваат со летови од Кина, како и со брод на два острови, ќе мора да направат тестови за ковид при пристигнувањето од 1 јануари до 31 јануари. Оние кои ќе бидат позитивни ќе можат да се изолираат, соопшти Централниот команден центар за епидемии на Тајван.
Малезија, исто така, воведе дополнителни мерки за следење и надзор.
САД соопштија дека размислуваат за преземање на „слични чекори“ како Јапонија.
„Постои зголемена загриженост во меѓународната заедница за тековните бранови на ковид 19 во Кина и недостатокот на транспарентни податоци, вклучително и податоци за вирусната геномска секвенца“,
изјавија американските власти.
Ванг Венбин, портпаролот на кинескиот министер за надворешни работи, во неколку наврати ги обвини западните земји и медиуми за „подгревање на ситуацијата“ и „искривување на прилагодувањата на кинеската политика за ковид“.
Ванг повика на „заеднички напори за да се обезбеди безбедно прекугранично патување, да се одржи стабилноста на глобалните индустриски синџири на снабдување и да се промовира економското закрепнување и раст“.
Велика Британија и Германија соопштија дека внимателно ја следат ситуацијата, но не размислуваат за нови ограничувања за кинеските патници.
Во Белгија, градоначалникот на туристичкиот центар Бриж ги повика посетителите од Кина да се тестираат за ковид.
Вистинската бројка на регистрирани случаи на дневно ниво како и на смртни случаи во Кина е непозната бидејќи официјалните лица престанаа да ги објавуваат податоците. Извештаите велат дека болниците се преоптоварени, а постарите луѓе умираат, пишува Би-би-си.
Минатата недела, Пекинг пријави околу 4 000 нови инфекции со ковид на дневна основа и неколку смртни случаи.
И покрај порастот на инфекциите, Кина ја продолжи својата програма за олабавување на строгите мерки за справување со ковид.
Во меѓувреме, Хонг Конг објави дека ги укинува мерките за справување со вирусот, освен носењето маски за лице, кое останува задолжително.