Поради корупцискиот скандал, ентузијазмот на Западот за неговата влада може да стивне во време кога европските земји се расправаат за испраќање тенкови „леопард 2“ од германско производство во Украина
Украинскиот претседател Володимир Зеленски најави отпуштања од највисоко до најдолно ниво, потег што следи по најсериозните обвинувања за поткуп од почетокот на руската инвазија пред една година.
Антикорупциската полиција во неделата соопшти дека го уапсила заменик-министерот за инфраструктура под сомнение дека лани во септември примил поткуп од 400 000 долари за увоз на агрегати, што министерот го негираше.
Дополнително, друга истрага, го обвинува Министерството за одбрана дека преплаќало добавувач на храна за војниците. Добавувачот рече дека имало техничка грешка и дека не се платени пари.
„Веќе има одлуки за отпуштања – некои ќе се случат денеска, некои утре – што се однесуваат на функционери на различни нивоа во министерства и други владини структури, како и на регионално ниво и во органите за спроведување на законот“,
рече Зеленски во видео порака.
Меѓу неговите планови се и зголемениот надзор на патувањата во странство за службени цели. Неколку украински медиуми објавија дека министри и високи функционери може веднаш да бидат разрешени.
Поради корупцискиот скандал, ентузијазмот на Западот за неговата влада може да стивне во време кога европските земји се расправаат за испраќање тенкови „леопард 2“ од германско производство во Украина.
Украина вели дека ѝ требаат тенковите за да ги пробијат руските линии и да ја вратат територијата.
Се верува дека Украина и Русија планираат офанзиви напролет за да го скршат ќор-сокакот во војната во источна и јужна Украина како што се приближува годишнината од почетокот на руската инвазија.
Германија, која мора да го одобри извозот на „леопард“, се воздржува, стравувајќи дека тоа би можело да ја поттикне Москва да ескалира. Но, под силен притисок од своите партнери, Берлин рече дека е подготвен да дејствува брзо доколку се постигне консензус меѓу сојузниците.
Портпаролот на Стејт департментот Нед Прајс, на брифинг со новинарите во понеделникот ги избегна прашањата за германската загриженост за испраќање тенкови и дали САД ќе поддржат други земји да испраќаат „леопарди“ без германска дозвола.
Кремљ коментира дека несогласувањата во Европа околу тоа дали да се испратат тенкови во Киев покажуваат дека има „растечка нервоза“ во НАТО алијансата.