Во интервјуто за Ен-би-си њуз, украинскиот претседател рече дека Путин сака да преговара не за да ја прекине војната, туку, како што рече, да договори прекин на огнот за да се укинат некои санкции кон Русија и да ѝ се дозволи прегрупирање на руската војска
Украина би имала многу тежок период на опстанок без воената поддршка од Соединетите Американски Држави (САД) во одбраната од руската инвазија, рече претседателот Володимир Зеленски во интервју за Ен-би-си њуз.
„Веројатно ќе биде многу, многу, многу тешко. И, се разбира, знаете дека во сите тешки ситуации, имате шанса. Но, ќе имаме мали шанси – мали шанси за опстанок без поддршката на САД“,
изјави Зеленски за Ен-би-си њуз.
Додаде дека Украина го зголемила своето воено производство, но не доволно за да го надомести она што потенцијално би го изгубила без американската поддршка.
Во интервјуто за американската телевизија, Зеленски рече дека Путин сака да седне на преговарачка маса не за да ја прекине војната, туку, како што рече, да постигне договор за прекин на огнот за да се укинат некои санкции кон Русија и да ѝ се дозволи на руската војска да се прегрупира.
„Тоа е навистина она што тој го сака. Тој сака пауза, подготовка, тренинг, укинување на некои санкции поради прекинот на огнот“,
рече Зеленски.
Украинскиот претседател вчера на маргините на Минхенската безбедносна конференција имаше средба со американскиот потпретседател Џеј Ди Венс, кому му порача оти на Украина ѝ требаат вистински безбедносни гаранции пред какви било разговори за ставање крај на војната со Русија.
Нивниот разговор уследи откако американскиот претседател Доналд Трамп претходно оваа недела телефонски раговараше и со рускиот и со украинскиот претседател, во насока на отпочнување мировни преговори.