Украинскиот претседател Володимир Зеленски на Твитер ѝ се заблагодари за С Македонија за приклучувањето кон декларацијата на земјите на Г7 за поддршка на безбедносните граници на Украина.
„Благодарен сум на Северна Македонија што се приклучи кон декларацијата на Г7 за поддршка на безбедносните гаранции за Украина. Вкупно 15 земји веќе се приклучија. Благодарност до премиерот Димитар Ковачевски за неговите лични напори за зајакнување на партнерството меѓу нашите земји“,
напиша Зеленски.
Вдячний Північній Македонії за приєднання до декларації G7 щодо підтримки безпекових гарантій для України. Загалом приєдналися вже 15 країн. Дякую Премʼєр-міністрові Димитару Ковачевському @DKovachevski за його особисті зусилля зі зміцнення партнерства між нашими країнами. 🇺🇦🇲🇰
— Володимир Зеленський (@ZelenskyyUa) August 15, 2023
Земјите од Г7 на 12 јули годинава, на маргините на самитот на НАТО во Вилнус, Литванија, објавија безбедносна рамка која го отвора патот за долгорочни безбедносни гаранции за Украина со цел да ја одбрани земјата од Русија и да ја одврати од можна идна агресија.
Во декларацијата се наведува дека денеска ќе започнат преговорите со Киев за официјализирање на постојаната поддршка на членките на Г7 за Украина и дека тоа ќе вклучува поддршка за понатамошен развој на украинската одбранбена индустрија, обука на украинските сили, размена на разузнавачки информации и поддршка во одбраната на сајбер просторот.
Покрај тоа, членките на Г7 ќе работат на зајакнување на економската стабилност и отпорност на Украина, што вклучува обнова и закрепнување на земјата по агресијата. Истовремено на Украина ќе и биде овозможена техничка и финансиска поддршка за сегашните потреби, поради руската инвазија, но и ќе ѝ се овозможи да продолжи со спроведувањето на реформите.
За возврат, Украина ќе продолжи да спроведува судски, економски, безбедносни реформи, како и реформи во борбата против корупцијата, што ќе покаже дека Киев е посветен на демократијата, владеењето на правото, почитувањето на човековите права и слободата на медиумите.