Жовква рече дека Украина е отворена да разговара за неутралност „доколку НАТО засега не е подготвен да ја прифати“, но бара огромни безбедносни гаранции за да не се повторат вакви агресии
Украинскиот претседател Володимир Зеленски е подготвен директно да разговара со рускиот претседател Владимир Путин, но „нема да направи никаков компромис“, изјави заменик-шефот на Кабинетот на Зеленски за Си-ен-ен.
Иако разговорите меѓу украинските и руските министри за надворешни работи, одржани вчера во Анталија, не донесоа никаков голем напредок, Украина не беше премногу оптимист од самиот почеток, рече Игор Жовква.
„Добро е што се сретнаа, но за жал можеме да кажеме дека министерот за надворешни работи на Русија не е тој што ја носи конечната одлука. Конечната одлука да се запре војната, за прекин на огнот, за повлекување на војниците ја носи само едно лице“,
рече тој, очигледно мислејќи на Путин.
Жовква рече дека иако Зеленски е подготвен за дипломатско решение, тој не се слушнал лично со рускиот претседател или со неговите помошници.
„Последното нешто што го слушнав беше дека се уште треба да работиме во формат на две делегации… Но, погледнете, дури ни договорите постигнати за време на овие преговори не се одржуваат“,
рече Жовква, посочувајќи ги хуманитарните коридори во Украина.
Жовква рече дека Украина е отворена да разговара за неутралност „доколку НАТО засега не е подготвен да ја прифати“.
„Но, во исто време, ни требаат тешки безбедносни гаранции за Украина, така што овие ужасни војни, оваа страшна агресија да не се повторат во иднина“,
додаде тој.
Жовква рече дека Украина сака да соработува со Путин и нејзините соседи за да воспостави систем што тој го нарече „обновен безбедносен систем на Европа“.
„Мојата земја, украинскиот народ заслужува да стане дел од европското семејство… Украина се бори за безбедноста на цела Европа. Значи, кога францускиот претседател Макрон зборува за можна европска безбедност, како може да зборува без да го има претседателот Зеленски на маса? Без да ги имаме претседателот Зеленски и Украина во Европската унија?“,
изјави Жовква.
Изјавата на претставникот на Кабинетот на Зеленски е во време кога пристигнуваат информации за нови гранатирања од руските сили, овој пат на Днипро и Луцк.