Споменикот во Слупчане треба да биде готов кон крајот на ноември, а ќе чини близу 200 илјади евра
Пред стартот на предизборието, во Општина Липково ќе почне изградба на споменик на ОНА, кој, според најавите, би бил готов кон крајот на ноември, односно набрзо откако ќе завршат локалните избори.
Изградбата на споменикот во селото Слупчане ќе ја чини општината близу 200 илјади евра, односно 12 115 109 денари, според договорот за јавна набавка што вчера го објави Бирото за јавни набавки. Спомен-кулата ќе ја гради фирмата „Хоџа инженеринг“ од Куманово, која има рок изградбата да ја заврши за шест месеци, односно до 25 ноември.
Градоначалникот на Липково, Еркан Арифи, неодамна изјави дека изградбата на споменикот доцни. Досега се поминати разни процедури, а урбанистичкиот план на општината започнал во 2015 година, вели тој, пренесува Фокус.
„Како градоначалник на Општина Липково наидов на затворање и завршување на урбанистичкиот план. Можеби ова е единствен споменик со камен-темелник, со дозвола за градба, со урбанистички план, има еден главен проект, ревизија на проектот, што значи дека е легален и е регистриран во Министерството за транспорт и врски и катастарот“,
истакна неодамна Арифи.
Лидерот на ДУИ, Али Ахмети, на почетокот на мај беше во Слупчане, каде што беше одбележана 20-годишнината од политичко-безбедносниот конфликт во земјава во 2001 година. Ахмети тогаш положи цвеќе на спомен-плочата на борците на ОНА и изјави дека големиот споменик ќе биде готов до 28 ноември – Денот на албанската азбука.
„Не само на годишнини, туку во секој момент ние се сеќаваме на сите генерации, сите тие загинати соборци, за нивните дела да не се заборават, туку да се остварат на начин како што доликува“,
изјави тогаш Ахмети.
Минатиот викенд, Ахмети објави дека ДУИ се ребрендира и дека станува „зелена партија“, во чиј фокус на дејствување во иднина ќе бидат подобрувањето на животната средина, односно пристапот до чиста вода и воздух, чистењето на дивите депонии, намалувањето на емисиите на гасови…
Премиерот Зоран Заев, како коалициски партнер на ДУИ, оцени дека е добро што партијата ги напушта етничките теми и се врти кон теми што се од интерес на сите граѓани.
Во меѓувреме, ДУИ ги почна подготовките за локалните избори, така што Ахмети повторно беше во Липково, каде што го промовираше актуелниот градоначалник Еркан Арифи како кандидат и на претстојните локални избори.