Потпретседателот на СДСМ вели дека никогаш не го прекршил полицискиот час
Потпретседателот на СДСМ, Мухамед Зекири, го коригира лидерот на СДСМ, Зоран Заев, кој објави денеска дека неговиот соработник се заразил на ифтар кај својот брат.
Зекири, во објава на Фејсбук, вели дека за целото времетраење на полицискиот час, ниту имал дозвола за движење ниту кога било прекршил некоја од мерките за забрана за движење. Тој посочува дека Заев направил ненамерна грешка.
„Поради ненамерната грешка на претседателот Зоран Заев на денешната прес-конференција дека сум се заразил на ифтар кај брат ми, сакам само да ве информирам дека за целото времетраење на месецот Рамазан сите ифтарски вечери ги имав дома, само со членовите на домаќинството – и без посети од никого. Првото излегување ми беше на бајрамскиот викенд и за празникот имав средба само со најтесното семејство. Тие лица ќе бидат допрва тестирани, така што досега само ние сме потврдени позитивни на вирусот“,
пишува Зекири.
Тој посочува дека самиот ја соопштил веста за заразувањето, а и дека завршила целата анкета со епидемиолозите.
„Со оглед на тоа што има засегнати лица, кои, за разлика од мене, не се јавни личности, ве молам за почитување на нивната приватност“,
апелира Зекири.