Во соопштението испратено до медиумите, од Здружението на контролорите на летање на Македонија велат дека најавениот штрајк на Синдикатот е кулминација на претходните заеднички барања за подобрување на функционирањето на М-НАВ
Од Здружението на контролорите на летање на Македонија (ЗКЛМ) најавија поддршка на штрајкот што вчера го најави Синдикатот на контролорите на летање при М-НАВ поради, како што истакнаа од Синдикатот, нерегуларности во процесот на вработувања, како и поради застареноста на опремата во компанијата и условите за работа.
Во соопштението испратено до медиумите, од ЗКЛМ велат дека најавениот штрајк е кулминација на претходните заеднички барања за подобрување на функционирањето на М-НАВ.
„Нашите заеднички барања се интензивираа во последните година и половина, за што се доказ многубројните дописи до менаџментот бидејќи условите во кои работиме се повеќе од срамни за компанија од оваа индустрија“,
наведува Здружението на контролорите на летање на Македонија.
Од ЗКМЛ посочуваат оти контролорите и помошниците на контролорите на летање работат во супстандардни услови и во услови кои ги загрозуваат нивното здравје. Велат дека работат со застарени системи за вентилација на воздухот, ладење и греење кои не се сервисирани со години, недостиг и рестрикции на вода. Додаваат оти опслужувањето на авиосообраќајот се води со застарен и технолошки ограничен систем за контрола на летањето.
Од Здружението реагираат и за неодговорно менаџирање со ресурсите во М-НАВ за кое велат оти доведува до создавање нечовечки услови, деградирачка и немотивирачка атмосфера на работа.
„Токму поради овие причини застануваме покрај Синдикатот и ја поддржуваме одлуката за штрајк, а воедно бараме од менаџментот на М-НАВ да се воздржи од лични напади кон поединци како и да покаже достоинствен третман кон контролорите и помошниците контролори на летање, како и за сите останати професионалци и оперативен персонал“,
додаваат од Здружението во писменото соопштение.
Како што вчера најави претседателот на Синдикатот на контролорите на летање при М-НАВ, Александар Тасевски, штрајкот ќе се одржи на 12 октомври од 11 до 17 часот, а во тој период нема да се опслужуваат воздухоплови на аеродромите во Скопје и Охрид.
Менаџментот на М-НАВ, пак, ги оцени за тенденциозни и невистинити тврдењата на претседателот на Синдикатот на контролорите за летање, кој најави штрајк поради нерегуларности во процесот на вработувања и внатрешните прераспоредувања, како и поради застареноста на опремата во компанијата.