Случајот на социјалната мрежа Фејсбук го обелодени свекорот на 19-годишната пациентка, кој побара помош од министерот за здравство Сашо Клековски, посочувајќи дека неговата снаа, мајка на две деца на возраст од еден месец и три и пол години, не може да оди по царскиот рез извршен во штипската болница
Од Министерството за здравство денеска соопштија дека е издаден налог до Државниот санитарен и здравствен инспекторат (ДЗСИ) да изврши вонреден инспекциски надзор за случајот со 19-годишната пациентка која останала парализирана по царски рез направен во Клиничката болница во Штип.
„По добивањето на инспекцискиот наод и целокупната медицинска документација, ќе иницираме и стручен надзор над досегашниот тек на лекувањето и постапувањето на здравствените работници и установи вклучени во случајот. Ова се прави со цел целосно, објективно и стручно утврдување на сите околности поврзани со лекувањето на пациентката“,
велат од Здравство.
Оттаму апелираат да не се изнесуваат предвремени заклучоци додека не се завршат надлежните постапки, како и дека за утврдената фактичка состојба и за евентуалните натамошни ерки, јавноста ќе биде навремено и транспаретно информирана.
Весникот „Слободен печат“ објави дека 19-годишна жена од струмичкото село Баница, по царски рез извршен во Клиничката болница во Штип, развила параплегија и во моментов користи инвалидска количка.
Според објавените информации, станува збор за нејзин втор царски рез.
Случајот на социјалната мрежа Фејсбук го обелодени свекорот на 19-годишната пациентка, кој побара помош од министерот за здравство Сашо Клековски, посочувајќи дека неговата снаа, мајка на две деца на возраст од еден месец и три и пол години, не може да оди по царскиот рез извршен во штипската болница.