Од Здравство велат дека потпорниот ѕид зад Клиниката за детски болести е изграден на државно земјиште, а Министерството нема прибележано право за трајно користење на тоа земјиште, додека пак од Општина Центар нагласуваат дека доколку било до нив, проблемот одамна ќе бил решен
Откако вчера падна дел од потпорниот ѕид на улицата „Белградска“ зад Клиниката за детски болести, денеска одговорноста за тоа под чија надлежност е ѕидот се префрла меѓу институциите.
Градоначалникот на Општина Центар, Горан Герасимовски, денеска ги демантира наводите дека санацијата на потпорниот ѕид на Клинички центар и улица „Белградска“ се во надлежност на Општината.
Тој вели дека со одлука на Советот и договорот што е склучен меѓу Град Скопје и Општина Центар на 5 август 2019 година, градските власти ја преземаат обврската за проектирање, изградба, користење, заштита и одржување на неколку улици на подрачјето на Општина Центар, во листата е и улицата „Белградска“.
Во договорот, како што вели Герасимовски, децидно стои „Општина Центар се обврзува да не презема активности кои би ги попречиле или нарушиле проектирањето, изградбата, користењето, заштитата и одржувањето на наведените сообраќајници во Општината“.
„Овој проблем се провлекува со години и постојано одговорот е ист, безбедноста и функционалноста на ’Белградска’ не е наша надлежност. ЦУК и пред две години алармираше за состојбата со потпорниот ѕид кај Универзитетската клиника за детски болести и безбедноста на улицата ’Белградска’. На нивна иницијатива, Министерството за здравство посочи дека за санацијата е потребна координирана активност на јавните претпријатија на Град Скопје. И тогаш, Општина Центар, на 30.12.2022, децидно одговори дека безбедноста и одржувањето на ’Белградска’ согласно Договорот од 05.08.2019, е обврска на Град Скопје. Да беше до нас, проблемот одамна ќе се решеше“,
додава градоначалникот Герасимовски.
Согласно договорот за меѓуопштинска соработка меѓу Градот и Општината, Герасимовски вели дека сите обврски за одржување на функционалноста на улица „Белградска“, што подразбира и градежни активности ако е потребно, е одговорност и обврска на Град Скопје, а Општина Центар не смее да презема активности во тој домен.
Во врска со дел од ѕидот што вчера падна, денеска се огласија и од Министерството за здравство.
Оттаму велат дека паднатиот потпорен ѕид зад Клиниката за детски болести е изграден на државно земјиште, а Министерството нема прибележано право за трајно користење на тоа земјиште.
„Секој од објектите во Клиничкиот центар има право на користење на објектите, но нема доделено право на трајно користење на земјиштето околу клиниките. Во интерес на граѓаните, потребно е да се изнајде итно решение во заеднички напори со надлежните институции Градот Скопје и Општина Центар кои треба да бидат иницијатори за решавање на проблемот, поради тоа што се работи за улица, а надлежните инспекциски служби да дадат мислење за моменталната безбедност“,
се вели во соопштението испратено од Здравство.
Вчера директорот на Центарот за управување со кризи (ЦУК) Стојанче Ангелов, апелираше до Министерството за здравство, до Град Скопје и до Општина Центар итно да се зафатат со надминување на оваа опасност за граѓаните. Тој вели дека е прашање на ден, а можеби и на час кога ќе се урне и преостанатиот дел од ѕидот под кој се паркираат возила, но се движат и лица кои влегуваат во кругот на Клиничкиот центар.
Ангелов рече дека под улицата „Белградска“, која го разграничува клиничкиот центар со куќите над него, постои систем од шахти, од подземни канали чија сопственост не може да се утврди, а кои се во лоша кондиција и не ја собираат подземната вода која доаѓа од падините на Водно поради што таа избива на самиот ѕид и дополнително ја нарушува неговата стабилност, но и на самата улица.
Според Ангелов, доколку не се реши проблемот може да дојде и до полошо сценарио односно постои можност возила што се движат по оваа тесна улица, која е проодна во два правци, да дојде до уривање не само на ѕидот туку и на дел од улицата.