Вкупно 48 угостителски објекти низ земјава се затворени со решенија од пазарните инспектори поради непочитување на владините мерки за спречување на ширењето на коронавирусот, информираше на прес-конференција претседателката на Инспекцискиот совет, Магдалена Филиповска-Грашкоска.
„Општа констатација е дека поголемиот дел од субјектите ги почитуваат владините мерки за превенција од ширење на коронавирусот, но за жал еден дел од угостителските објекти, особено во руралните, продолжуваат да ги прекршуваат мерките“,
порача Филиповска-Грашкоска
Претседателката на Инспекцискиот совет вели инспекторатите во период од 2 до 5 април извршиле речиси 4 000 контроли.
Во нив, како што вели, биле затворени и 215 кафемати, за кои апелираше граѓаните да не ги користат ниту нив ниту апаратите за вода бидејќи може да бидат извор на зараза.
Агенцијата за храна и ветеринарство во своите инспекции издала 15 решенија за месарници и маркети во кои е констатирана лоша хигиенска состојба.
Деновиве биле изречени и две глоби од АХВ, една за непочитување на претходна наредба од инспектор и друга поради држење производ без декларација.
Дополнително, Филиповска-Грашкоска изјави дека се вршат контроли и на замрзнатите цени на пазарите, каде што, како што кажа, не биле забележани значајни прекршувања и трговците веднаш постапиле според укажувањата на инспекторите.