Иако потенцијалната средба засега не е ни на повидок, премиерот вели дека треба да му се даде шанса на процесот, но додаде: „Немаме намера по која било цена да одиме со главата во ѕид, нема по која било цена да потпишуваме сè што ќе ни биде ставено на маса“
Премиерот Христијан Мицкоски засега нема детали кои би можел да ги сподели со јавноста, а да се однесуваат на евентуалната средба со новиот бугарскиот премиер Росен Жељазков. Рече дека кога ќе постојат какви било детали во врска со можната средба со челникот на бугарската влада, јавноста ќе биде информирана.
Иако потенцијалната средба засега не е ни на повидок, премиерот вели дека треба да му се даде шанса на процесот, но додаде:
„Немаме намера по која било цена да одиме со главата во ѕид, нема по која било цена да потпишуваме сè што ќе ни биде ставено на маса. Нашите размислувања и политики ги знаете. Имаме легитимитет од народот и мора да го слушаме народот. Политичари коишто не го слушаат народот завршуваат многу лошо.“
Мицкоски одговараше на новинарско прашање дали исконтактирал со бугарските колеги за да започне дијалогот за кој тој изрази подготвеност и за тоа каков повратен одговор добил доколку стапил во контакт.
Претходно денеска лидерот на опозицискиот СДСМ, Венко Филипче, рече дека очекува сега, кога има политички соговорник во Софија, македонската влада што поскоро да ги започне разговорите за одмрзнување на преговорите за членство во Европската Унија, како што претходно најавуваше. Се надева дека во тој процес ќе се вклучат и Европската Унија и Соединетите Американски Држави (САД), како наш традиционален партнер.